«Garbitzaile gutxiago, eta kaleak gero eta zikinago»

«kaleak garbitzeko kon­tra­tua aldatu egin du Bil­duk, eta erabaki horiek har­tuta, jakina da kaleak gero eta zikinago izango ditugula Hernanin». Hori diote EAJ-PNV eta Hamaikabat alder­diek, Kroni­kara bidalitako prentsa oha­rrean. Joan den asteko Ple­noan, erabaki zen FCC en­presa eta Hernaniko Udalak daukaten kontratua aldatzea, Gobernu Taldeko kideek alde boz­ka­tuta, eta oposizioak kontra. Ha­maikabat alder­diak eta EAJ alderdiak salatu egin dute erabaki hori. «Bilduren helburua izan da dirua aurreztea. Murriztu egingo du kale-garbiketa zerbitzua larunbat eta igan­deetan, eta gaur egun 11 lan­gile badira, hemendik aurrera 5 izango dira. Horrez gain, denbora bateko bajak ez dira kubrituko, hemendik aurrera. Horrela, 5.800 euro aurreztu nahi dira, hilero», hala diote prentsa oharrean bi alder­diek. Hori horrela izanda, salatu nahi dute, beste gastu batzuk ez direla batere murriztu: «Atez Atekoan ez dago ahorro planik. Batere gardena ez den Garbita­nia enpresari ere faktura guztiak ordainduko zaizkio, txintik esan gabe. Helburua da Atez Ateko gastu ikaragarria man­tentzea: 1.800.000 euro; eta kale garbiketa murriztu: 950.000 euro. Kalean zabor ontzirik gabe, garbitzaile gutxiagorekin, eta Atez Ateko ikutuezin honekin, kaleak gero eta zikinago».