Hernani’n Musik ekimenaren udazken denboraldiko azken emanaldia izan zen asteazkenean. Sarrera guztiak salduta, Biteri lepo bete zen, Ana Otxoa sopranoaren eta Alberto Nuñez tenorearen opera doinuak entzuteko. Anabe Hernandez pianojolea izan zuten lagun. Idoia Noble aurkezleak adierazi bezala, nabarmen geratu zen Hernanin badela operarako afizioa. Garai batean, zarzuela asko izaten omen ziren Zintzotasuna aretoan, eta jendeak ez zuen alferrik galdu opera doinuak entzuteko aukera berri hau.
Milaka sentimendu airean
Ana Otxoa sopranoaren eta Alberto Nuñez tenorearen ahots indartsuek dardarka jarri zituzten Biteri bete zuten entzuleen belarriak.
Maitasuna eta pasioa, drama eta tragedia, goxotasuna eta lilura... milaka sentimendu adierazteko gai izan ziren kantariak. Gounod, Verdi edota Donizetti konpositoreen doinuak interpretatu zituzten lehenengo zatian, eta Usandizaga, Guridi, Guerrero edota Sorozabalenak, bigarrenean. Entzuleek, gero eta animatuago, txalo zaparrada haundi batez erantzun zieten, eta abeslariek eguberri doinu bat oparitu zieten, ordainetan.
Berriro elkartzeko desioa
Asteazkeneko emanaldia izan zen udzaken denboraldiko azkena. Datorren urtean berriro elkartzeko aukera izateko desioa azaldu zuten antolatzaileek.