Dokumentala ikusi eta ondoren, eztabaidatzeko aukera izango da gaur, arratsaldeko 19:00etatik aurrera, Biteri kultur etxean. Sarrera doanekoa da.
Koxka elkarteak, desgaitasuna duten pertsonen Hernaniko elkarteak, antolatu du zineforuma, gaurkoa Desgaitasunaren Nazioarteko Eguna baita. Apaga la luz y veras dokumentala jarriko dute, itsuen ikuspegia ezagutzera emateko eta gaiaren inguruko hausnarketa bultzatzeko.
Protagonistekin hitz egiteko aukera
Dokumentala ikusi ondoren, eztabaidarako tartea irekiko da. Bertan izango dira, Tim Dabringhaus, dokumentalaren zuzendaria; eta dokumentaleko hainbat protagonista.
Ikusmen eza ez da ikustezina
Apaga la luz y veras dokumentalean hainbat itsu agertzen dira, beren bizitzaren inguruan duten iritzia azaltzeko eta beren sentimenduak adierazteko.
Desgaitasunaren Nazioarteko Eguna izanik, Koxka elkarteak azaleratu nahi izan ditu desgaitasun mota desberdinak dituzten pertsonek eguneroko bizitzarako izaten dituzten oztopoak eta horiei aurre egiteko dituzten moduak.