«kantu zaleentzat eta opera zaleentzat opari bat» bezala deskribatu zuen Joxan Goikoetxea hernaniarrak asteazkeneko emanaldia, Henani’n Musik aurkeztu zutenean. Alberto Nuñez tenorea, Ana Otxoa sopranoa eta Ana Begoña Hernandez pianojolea elkartu dira, Gauez operan emanaldirako. Hiru maixuk, Italiako bel cantoa eta lirika Hernanira ekarriko dituzte. Gaueko 22:00etan hasiko da saioa, Biterin. Sarrerak salgai jarriko dituzte bihartik Biterin, 7 euroan.
Euskal opera eta Zarzuela
Guridi edo Usandizaga bezalako euskal autoreen opera zatiak interpretatuko dituzte hasieran. Euskal operari eskainiko diote lehendabiziko erdia, eta bigarrenean Zarzuelan sartuko dira. Bakarka eta binaka, soloak eta duoak egingo dituzte Nuñez barakaldoztarrak eta Otxoa bilbotarrak. Pianoarekin laguntzen beste bilbotar bat ariko da, Hernandez, kantuan ere ederki moldatzen dena, kantu irakasle ari baita.
Kontzertu lirikoa
Interpretazio lan bat ikusiko du Biterira asteazkenean gerturatzen denak. Opera lanen aria zatiak kantatuko dituzte, eta esan liteke, kontzertu lirikoa izango dela.
Hiru artista haundi
Hiru bizkaitar eta hiru artista haundi datoz asteazkenean Biterira. Alberto Nuñez tenoreak goi mailako ikasketak dauzka eta hainbat sari, eta ezaguna da Cafes Fortalezako anuntzioari ahotsa jartzeagatik. Ana Otxoak Musikenen ikasi zuen eta hainbat talde espezializatutan aritu da, Easo koroa, tartean. Ana Begoña Hernandezek ere goi mailako ikasketak ditu. Pianoa jo eta kantatu ere egiten du. Kantuko irakasle lanetan ari da, besteak beste, eta solista gisa ere bai. Haendelen Mesias interpretatu izan du, edo Mozarten koronazio meza.