nobedade haundia dute aurten Hernaniko kirolariek. Abenduaren 14an, Sandiusterrin, hiru sari banatuko dira, kirol munduan egindako lana eskertzeko. Ekitaldi hau antolatu du Hernaniko Kirol Batzordeak; talde horrek urtebete lanean daramaki, eta herriko 22 kirol taldeak biltzen ditu. Hiru sari banatuko dira: 1) Kirol Saria, 2012ko kirol lorpenengatik emango da. 2) Babes Saria, kirol talde batean egindako lana eskertzeagatik emango da. 3) Hernani Saria, ibilbide oso bat saritu nahi da, kirolari gisa, edo antolatzaile gisa. Hernaniko 22 kirol talde horiek proposamenak egin dituzte, eta sei hautagai daude hiru sarietarako. Datozen asteetan erabakiko dute sei horietatik zein hiruk jasoko duten saria. Kirol Saria jasotzeko hiru hautagai daude: Aitor Gorrotxategi pelotaria; Ane Lopez de Arregi atleta; eta Errugbi Taldea. Babes Saria jasotzeko talde bakarra dago, Hernaniko kross herrikoiak antolatzen dituen taldea. Hernani Saria izango da sari nagusia, eta horretarako bi hautagai daude: Batis Larburu, arraun taldean urte luzez egindako lanagatik; eta Ricardo Ramos, CD Hernani taldeko lehendakari gisa pasatako urte guztiengatik eta egindako lanarengatik.
Sari banaketa honek ordezkatuko ditu, Udalak egin izan dituen harrerak
Kirol Batzordeak aho batez erabaki zuen urtero hiru sari banatzea, eta Udalak harrera ofizialik ez egitea Hernaniko kirol taldeei. Arrazoiak bi dira, batez ere. Batetik, ebitatu egiten da kirol jakin batzuetan zentratzeko arriskua. Bestetik, kontuan hartzen da beste jende baten lana, kirolari ez izanagatik, kirolaren alde lan haudia egin baitute. Asmoa da, Hernaniko kirol sekzio guztiek lekua izatea ekitaldi horretan, aurten ez bada, datozen urteetan.
Aukeraketa, bi fasetan
Aukeraketa bi fasetan egingo dute, Hernaniko kirol taldeek. Lehenengoa zen, hautagaiak proposatzea, eta orain, epea zabalik daukate beren botua emateko. Sei hautagaietatik hiruk jasoko dute saria, aipatzea denek merezi izan arren. Abenduaren 5era bitarte izango da botua emateko aukera. Dena dela, irabazleak zein diren ez da jakingo azkeneko egunera arte. Sandiusterriko ekitaldian bertan jakinaraziko dituzte irabazleen izenak.
Hitzaldi motx batekin hasiko da ekitaldia
Ekitaldiari hasiera emateko, Dorleta Ugaldek hitz egingo du, kiroleko genero berdintasunari buruz.
Hernani Saria - Hautagaiak
Batis Larburu, arraunlari eta lehendakari
40 urte baino gehiagoz Arraun Elkarteko zuzendaritzan (1970-80-90-2000 hamarkadak). Arraun Elkarteko lehendakari 90-2000 hamarkadetan. Arraunlari, zazpi urtez (1971-78). Tartean, Kontxako Banderan laugarren, Pedreña eta Astilleroko banderak, Espainiakoan 3garren, Gipuzkoakoan 2garren, Zarauzkoan 2garren...
Ricardo Ramos, CD Hernaniko lehendakaria
Elgoibarren futbolean jokatutakoa, hirugarren mailan. Hernanira etorri, eta CD Hernanin sartu zen Ceferino Ormazabalek konbentzituta. 43 urtez zuzendaritzan, eta azken 20 urteetan lehendakari. Gipuzkoako delegatu onenaren saria eman zioten, eta CD Hernaniko urrezko intsignia ere bai.
BABES Saria - Hautagaiak
Hernaniko kross herrikoien antolatzaileak
Hamar lagun ari dira talde honetan jo eta su, urteroko hiru karrera herrikoiak antolatzen. Adarraga memoriala, Hernanin ohitura haundiena daukana, aurten 59garren aldiz egin dute. Azeri Bila, dagoeneko sendotuta dagoen lasterketa da, 700 parte hartzaile inguru dituena, 13garren edizioan. Sagar Lasterra, azkenik, indarra hartzen ari da; aurten, seigarren edizioan, 300 lagunek parte hartu zuten.
Antolatzaileak: Manu Irastorza, Migel Angel Garin, Javi Galan, Juan Luis Alfaro, Mariano Valles, Javi Rodriguez, Jose Andres Iturralde, Goio Ortiz, Carlos Gallego, Josetxo Etxeberria.
Kirol Saria - Hautagaiak
Ane Lopez de Arregi, atleta
15 URTE ditu, eta Gipuzkoako maila absolutuan 5garren postua lortu du luzera jauzian. Alebin mailako Euskadi eta Gipuzkoako luzera jauziak irabazi zituen. Kadeteetan, Euskadi eta Espainiako txapelduna da luzera jauzian, aire librean. Pista estalian, Euskadikoa irabazi zuen luzera jauzian eta Espainian 3garren postua lortu. 300 metroan, Euskadiko 3garren.
Aitor Gorrotxategi, pelotaria
afizionatuetan hiru atzelari onenen artean dago Gorrotxategi. Azken bi urteetan dena irabazi du, Gipuzkoa, Euskal Herria eta Herriarteko Txapelduna da, adibidez. Herriarteko 4 Txapel irabazi ditu (Hernanik 5 ditu). 9 urterekin hasi zen pelotan, eta kadetea zenetik nabarmendu. Hainbat sari irabazitakoa da, tartean DV txapelketa, txapelketa pribatuetan garrantzitsuena.
Hernaniko Errugbi Taldea
47 URTEKO historia dauka errugbi taldeak. 1978-87 urte bitartean Ohorezko A mailan jokatua, eta lau aldiz txapeldunorde izana. 2012an berriz igo da Ohorezko A mailara, 25 urte eta gero. Jubenilak bi aldiz Estatuko Txapeldun, eta Kadeteak behin txapeldunorde (1987) eta behin hirugarren (1999). Azken 12 urteetan, jubenil, kadete eta infantilek 15 aldiz Euskadikoa. Nesken taldea sortu zuen iaz.