Euskal Herri berria asmatzen izenburua jarri dio Olariagak bihar emango duen hitzaldiari. Besteak beste, ezker abertzale berriaren aportazioen inguruan hitz egingo du, 19:30etatik aurrera, Biteri kultur etxean. Andoni Olariaga filosofian lizentziatua da, eta filosofia gaiei buruzko Lapiko Kritikoa blogeko partaidea ere bada. 2010ean, Modernitatearen auziaz liburua argitaratu zuen Jon Jimenezekin batera. Nazioa, nazionalismoa, kolektibo imajinarioak eta euskal identitatea dira liburuan jorratzen diren gai nagusiak. Biharko hitzaldia lehenengoa izango da, Natza elkarteak antolatu duen Xake ukazioari! zikloaren barruan egingo diren hainbat hitzaldiren artean.
Ideologia hegemonikoa
Andoni Olariagak ezker abertzale berriaren, Sorturen aportazioaren inguruko hausnarketa egingo du bihar emango duen hitzaldian. Besteak beste, ideologia hegemonikoaz arituko da.
Olariagaren hitzetan, «hegemonia hitza modan dago egun, baina gaizki erabiltzen den kontzeptua da». Hegemonia zer den azaltzeko Sortu alderdi politikoaren ponentzia izango du ardatz, eta gaur egun egiten den kontzeptuaren erabilera okerra azaltzeko hainbat adibide emango ditu.
Ideologia espainolak hegemonia kontzeptua nola erabiltzen duen azalduko du, eta horren aurrean dugun erantzuteko moduaren inguruko kritika egingo du.
«Ideologia espainolak erabiltzen duen hegemonia politikaren atzean ondo pentsatutako operazioa dago, eta normalean, ez gara horretaz konturatzen».
Espainiatik datorren diskurtso hegemoniko horretaz jabetu eta erantzuna nola eraikitzen dugun ikusaraziko du Olariagak.
Biktimak eta biolentzia
Biharko Euskal Herri berria asmatzen hitzaldiaren beste ardatza biktimak eta biolentzia izango dira.
«Gaur egungo diskurtsoan aipatzen da atzera egingo bagenu berdin jokatuko genukeen edo ez». Hausnarketa horren inguruko kritika ere azalduko du Olariagak.
‘Xake ukazioari!’ zikloa
Natza elkarteak antolatu duen Xake ukazioari! zikloaren barruan egingo den lehenengo hitzaldia izango da biharkoa. Zehaztu gabe badaude ere, aurrerago beste pare bat egiteko asmoa azaldu dute antolatzaileek.