Denboraldiko partidu guztiak irabazi zituen Hernanik aurreko jardunaldira arte. Touringek lortu zuen txuri-berdeak garaitzea. Baina porrot hori atzean utzi eta berriz ere garaipenez garaipen jarraitzeko asmotan dira hernaniarrak atzo Aloña Mendiri 3-0 irabazita. Partidu serioa jokatu zuten etxekoek. Lehenengo zatian Javi Gutierrezek sartu zuen gola eta 1-0 iritsi ziren atsedenaldira. Bigarren zatian Mikel Olabideren gola iritsi zen. Eta partidua bukatzeko 10 minuturen faltan, Iñaki Zabaletak sartu zuen hirugarrena. Hernanik 3 puntu horiekin lidertzari eusten dio sendo eta bide horri eustea dute helburu. Hurrengo partidua Bergararen aurka jokatuko dute etxetik kanpo.
Emakumezkoen Ligan ere, Hernanik irabazi
Emakumezkoen Euskal Ligan ere, atzo jokatu zuen Hernanik. Eta kasu honetan ere, hiru puntu lortu zituzten txuri-berdeek. 1-3 irabazi zioten Arizmendiri.
Lehenengo zatian aukera asko izan zituen Hernanik eta horietako batean iritsi zen Olaia Jauregiren gola, buruz. Aurkariek, izan zuten aukera bakarra ederki aprobetxatzen jakin zuten eta 1-1 iritsi ziren atsedenaldira.
Bigarren zatian hernaniarrak gehiago izan ziren, baina partidua bere horretan bukatuko zela zirudien. Bukatzeko bi minutu falta zirenean sartu zituzten Jauregik eta Ylenia Moralesek beste bi golak.