hernaniko mendia, basoa, erriberak... monolitoak, landareak, bazterren izenak... ezagutzen al ditugu? Sekulako aberastasuna dauka Hernanik, eta hori erakusteko, oinezko 11 ibilbide prestatu dituzte. Ibilbide errazak dira, ikusgarriak, ondare edo patrimonio aldetik garrantzia dutenak, eta Hernani guztian banatu dituzte; hasi Santa Barbaran, eta Aparraineraino. Asteazkenean aurkeztu zuten Hernaniko Ibilbide Sarea Biterin, Hernaniko Udalak, Aranzadik eta Mendiriz Mendik. Aurkezpena egin zutenak: Luis Intxauspe alkatea, Iñaki Sanz Azkue Aranzadiko kidea, eta Txuso Gomez udal artxiboko langilea.
Natura zenbat eta gehiago ezagutu, orduan eta gehiago zaindu
Iñaki Sanz Azkuek azaldu zuen, natura ezagutzeak daukan garrantzia. «Naturaz gero eta urrutiago egon, orduan eta gutxiago ezagutzen dugu. Zenbat eta gutxiago ezagutu, orduan eta gutxiago zaindu». Horixe izan da arrazoi nagusia ibilbide hauek prestatzeko. «2002an ikerketa egin zuten beste herrialde batean. Umeei erakutsi zizkieten Pokemonen argazkiak, ea ezagutzen zituzten. Eta gero, inguruko landare ohizkoenen argazkiak. Ondorioa: pokemonak ezagutzen zituzten, eta landareak ez. Eta nahiago zuten pokemonak mantendu, landareak mantentzea baino». Iñaki Sanz Azkueren esanetan, ondare haundia dauka Hernanik, eta hori ezagutzeko moduan prestatu dituzte ibilbideak. «Hasi sagardotegietatik, eta Santa Barbarako gotorlekua, edo Ezteizarko pagadiraino».
11 ibilbide, ondo adieraziak
Ibilbidez ibilbide azaldu zuten egindako lana, Txuso Gomez eta Iñaki Sanz-Azkuek. Denek dira ondo egiteko modukoak, zirkularrak, Hernanin hasi eta buka egiten dira, ezaugarri ezberdinak dituzte, ez dira elkarrekin gurutzatzen, eta erakargarriak dira, gustagarriak. Diptiko urdinak, moreak eta arrosak daude. Denetan azaltzen dira deskribapen zehatzak, GPSko trakak eta abar. Ibilbide urdinak lau dira, eta marka txuri-urdinekin daude markatuak. Ibilbide moreak hiru dira (homologatuak ere deitu diete), eta marka txuri-hori eta txuri-berdeak dituzte. Ibilbide arrosak lau dira (freeriderrak ere deitu diete), eta ez dute seinalerik. Hala ere, diptikoan deskribapen zehatzak daude eta GPSko trakak jarrita. Diptikoak Biterin daude eskuragai, eta laster jarriko dituzte interneten ere.
IBILBIDE BAT: Oindiri bira
Adibide moduan, Hernaniko Kronikak bat aukeratu du: Oindiko bira. Ibilbide urdina da, eta markatua dago, marka txuri urdinekin.
Pardiolatxikin abiatuko gara, berriro hantxe bukatzeko. Tartean pasako ditugu besteak beste: Mugarriluze (metro batetik gorako mugarria), Pozontarri, Muniskue, Argurutze eta Saratsain.
Balio kultural eta historikoa: Gauza asko aipatu litezke bide honetan. Bat aipatzearren, Muniskue: burdin aroko multzo megalitikoa da, Euskal Herriko haundienetakoa.
l HIU 3, 8,4 km, 02:45 ordu, desnibela: 250 metro.
Hernaniko ibilbideak
Urdinak (diptiko urdina):
1-Santa Barbara
2-Sagardotegiak
3-Oindiri bira
4-Urruzuno
Homologatuak (dip. morea)
5-Epele
6-Ereñotzu
7-Oberan
Freeriderrak (dip. arrosa)
8-Latse
9-Usokori bira
10-Aparrain
11-Larregain