Euskera hutsean lan egiten duten 51 komunikabidek Hekimen elkartea sortu dute. Asteazkenean aurkeztu zuten Donostiako Koldo Mitxelenan. Tartean da Tokikom elkartea, Hernaniko Kronika eta beste hainbat komunikabide txiki biltzen dituena. Eta hain zuzen, Hekimen elkartean Tokikomek izango du zuzendaritza. Bere izenean, Iban Arantzabal izango da presidentea, bi urtetarako. Denera, zortzi kide izango ditu zuzendaritzak: Argia, Berria, Euskal Irratiak, Gaur 8, Gazteberri, Hamaika Telebista, Tokikom eta Xaloa Telebista.
Elkarrekin indar gehiago
Hekimenen helburua da, euskera hutsezko komunikabideen elkarlana bideratzea eta eragile eta instituzioen aurrean ahots bateratua izatea, euskal komunikazio esparrua indartzeko. «Euskal Herri euskalduna nahi badugu, komunikabide esparru indartsua izatea ezinbestekoa da. Euskeraren komunikazio esparrua txikia, ahula eta hauskorra da baina, asko gara eta pertsona askorengana iristen gara. 600 bat langile gara eta ehunka mila pertsonengana iristen gara», azaldu zuten aurkezpenean. Eta gaineratu zuten: «Bakarka baino elkarrekin hobeto egingo diogu aurre bizi dugun krisi latzari».