Liztor asiatikoa (vespa velutina) izugarri zabaldu da iaztik hona eta ondorioak ederki ari dira nabaritzen erlezainak. «Fagollaga gaineko aldean dauzkat nik erleak eta lehengo urtean bat edo beste ikusten nituen, baina aurten izugarria da, erleari ez diote uzten ateratzen. Erlea ez da ateratzen, ateratzen dena kamikaze bat da. Ondorioz, ezti produkzioa asko jaisten ari da. Irun, Zumaia eta Ordizia bitarteko eremu honetan, bataz beste, %30 jaitsi da produkzioa». Urkiolak aurreikusten duenez, «orain elkartean dauden 500 kide ingurutatik 20 batek utzi egingo dute».
«Europa mailako erantzuna behar da»
Urkiolaren arabera, irtenbide bakarra espezifiko bat lortzea da, «eurentzat erakargarria izango dena eta arrak esterilizatuko dituena, gehiago ez erreproduzitzeko». Udaberrian izango litzateke eraginkorra, erreginak ernaltzeko garaia denean. Bide horretan azterketak egiten ari dira, baina Gipuzkoa mailan, Diputazioarekin, eta Eusko Jaurlaritzak ere esku hartu beharko lukeela uste du Urkiolak. «Eta ez erkidegotik bakarrik, Europa mailan bilatu beharko litzateke konponbidea, penintsula guztian zabaltzen ari baita». Gutxienez gehiago ez zabaltzea da Urkiolaren nahia: «Mantentzea. Badakit ez ditugula akabatuko, baina behintzat inork gehiago ez dezala jasan gu orain jasaten ari garena».