Nafarroa, Galizia, Herrialde Katalanak, Extremadura, Castilla... herrialde eta kultura ezberdinek bat egingo dute gaurtik igandera bitarte Hernanin, Nabarrherri izeneko azokan. Hirugarren urtez antolatu du azoka Hernani Errotzen-Nabarralde taldeak eta aurten 50 postu baino gehiago izango dira kultura ezberdin horietako artisau lanekin gozatzeko. Aurten gainera, herriko hiru gunetara zabalduko dute azoka: Tiloseta, Gudarien plaza eta Plaza Berri.
Mota guztietako artisau lanak erosteko aukera izango da eta horrez gain, mokadu bat jan eta tragoren bat hartzeko postuak jarriko dituzte.
Ludoteka eta Hernani Errotzenen gunea
Umeentzako ludoteka ere izango du azokak. Hori Gudarien plazan izango da.
Eta, urtero bezala, nafar edo euskal kulturak protagonismo berezia izango du eta Hernani Errotzen-Nabarraldek gune propioa izango du. Elkarteari buruzko informazioa eta materiala izango da bertan, besteak beste. Horrez gain, audiobisualak jarriko dituzte: Gartxot, Orson Wellesen dokumentalak, Orreagako batailaren thrillerra...
Hernani, plaza ona
Hernani Errotzen taldeak Kronikari azaldu dio urtetik urtera haunditzen doala azoka eta gustora daudela aurreko bi urteetan lortutako erantzunarekin. «Artisauak ere gustora etortzen dira. Hernani plaza ona dela diote». Bestalde, eskerrak eman nahi dizkie Udalari eta boluntario guztiei.