Hernani, Donostia eta Astigarragako udalek eta URA agentziak (Eusko Jaurlaritza) akordio bat sinatu zuten astelehenean, Urumeako uholdeak saihesteko. Akordio horrekin zehaztu dituzte elkarlanaren xehetasunak eta baldintzak zeintzuk diren, hau da, Urumea Planak biltzen dituen neurriak martxan jartzeko elkarlanaren xehetasunak. Erakunde bakoitzak honako konpromisoak hartu ditu: URAk finantzatuko ditu ekimenak eta hiru udalek beharrezkoak diren aldaketak egingo dituzte hirigintza planeamenduan eta obretarako behar diren lurzoruak lortu eta eskura jarriko dizkiote URAri. Horrez gain, hitzarmenaren arabera, Jarraipen Batzorde bat osatuko dute sinatu duten erakundeetako ordezkariek. Batzordearen eginkizuna izango da aurreikusitako ekimenak jarraitzea, oztopoak saihestu eta konpontzeko.
18 ekintza, 2021era bitarte
Urumea Planak uholdeen aurkako 18 ekintza edo obra biltzen ditu; 2021era bitarte egingo dira. Bakarrik obrak kontuan izanda, 60 milioi euroko kostua izango du. Ekintzen artean daude, Karabel, Martutene, Loiola eta Egiako zubiak aldatzea, Añarbeko presan hobekuntzak egitea eta Txomin Enea auzoa moldadu eta berriro urbanizatzea.
PSE-EE: «Hitzarmena, albiste ona da»
Hernaniko PSE-EE alderdiak prentsa ohar bidez jakinarazi du instituzioek sinatutako akordio hori albiste ona dela: «Behin eta berriz uholdeek kaltetutako herritarrek eta udalek egindako eskariak kontuan izanda, albiste ona da». Eta gaineratu dute egoera jasanezina zela eta beharrezkoa zela neurriak hartzea kaltetutako erakunde guztien artean. «Urumea ibaia amesgaiztoa bihurtzen da euri zaparrada haundiak egiten dituenean. Eta uholdeak eragiten dituenean estuasuneko egoerak sortzen dira; Karabel auzoak askotan bizi izan duen egoera».