Galarretan egiten ari diren Parke Teknologikoan, hau da, Orona IDeO-Innovation Cityn, Ingeniaritzako bi titulazio berri eskainiko ditu Mondragon Unibertsitateak. 2013-2014 ikasturterako martxan izatea aurreikusten dute. Bi titulazio berri horiek honakoak dira: Energia Ingeniaritza eta Prozesu Industrialetako Ekoteknologiako Ingeniaritza.
Energia Ingeniaritza:
energia-premiei erantzuten
Gradu hori presentziazkoa izango da, eta helburua du, energiaren esparruan enpresen premiei erantzungo dieten ingeniariak prestatzea. «Energia kontsumoa inoizko altuena den honetan, beharrezkoa da energiaren erabileran eta sorkuntzan ohiturak aldatzea eta teknologia eta sistema berriak garatzea energia-eraginkortasuna eta energia berriztagarrien erabilera hobetzeko», diote.
Orain arte,
Alemanian bakarrik
Prozesu Industrialetako Ekoteknologiako Ingeniaritza, titulazio berri-berria da Estatuan, orain arte Alemanian baino ez delako eman. Presentziazko formatua du eta produktuak sortzen direnean, «prozesu berdeak» erabiliko dituzten ingeniariak sortu nahi ditu, ingurumenean duten inpaktua murrizteko asmoz. «Titulu horrek profesionalak sortu nahi ditu fabrikazioan, energiaren esparruan eta produktuen bizi-zikloaren optimizazioan», azaldu dute.