«Elkar gehiago ezagutzeko bildu gara. Uste dut interesgarria dela bi familia horrela biltzea», dio Aminu Muhammedek. Irantzu Jauregik ere halatsu uste du, «askotan, elkarren ondoan bizi eta elkar ez dugu ezagutzen; bakoitza geure munduan bizi gara». Hernanin bizi dira bata eta bestea, beren familiarekin. Bat Andoaindik etorria, eta bestea Ghanatik. Elkar ezagutzen zuten lehendik, lan kontuegatik-eta, baina atzo familian biltzea erabaki zuten, Gipuzkoan eta Europan beste 2.000 familiak erabaki bezala.
SOS Arrazakeriak antolatu du Bizilagunak izeneko ekimena, etorkinak integratzeko helburuarekin. Hernanin 20 familia elkartu ziren, Gipuzkoan 120, eta Europan 2.000. Elkar ezagutu ez, baina elkar ezagutu nahi; urduritasuna eta kuriositatea nahastuta, eta poztasuna ere bai, elkar aberastuko dutelako, bazkari goxo baten bueltan.
Atzo, gulak, paella eta bakailaoa pil-pilean izan ziren Jauregi eta Petxarromanenean; marrubi tarta, txokolatezko bizkotxoa... eta hernaniar onak bezala, Adarragako mil-hojasa. Dena primerakoa, Fuleratu, Zinadu eta Aminuren iritzian.
Gipuzkoan, 110 herrialdetako jendea bizi da, eta 100 hizkuntza hitz egiten dira. Hernanin, atzotik, kultura horietako bik elkar gehixeago ezagutzen dute.
«Askotan, elkarren ondoan bizi, eta elkar ez dugu ezagutzen»
Hernanin 10 etxetan bildu ziren atzo 20 familia, bertakoak eta atzerritarrak, etorkinak integratzeko ‘Bizilagunak’ programaren barruan. Europan 2.000 familia bildu dira, egun berean.
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!
Egin zaitez KronikaKide!