Durangoko liburu eta diska azokan 411 argitalpen berri izango dira aurten, abenduaren 6tik 9ra, 253 stand edo mahaietan banatuta. 300 ekitalditik gora ere izango dira, aurkezpen, emanaldi, tailer, hitzaldi eta bestelakoak kontuan hartuta. Doberak eta Kronikak Durangon jarriko dute liburu berria: Erritmoa, kazetariaren batuta. Argia astekariko mahaiean egongo da salgai. Kultura bat gonbidatzen du urtero Durangok, eta aurten Ijito Kultura izango da gonbidatu berezia. Argizaiola saria, Benito Lertxundik jasoko du.
289 liburu berri, 65 bideo, 32 aldizkari...
Guztira, 411 nobedade izango dira aurten Azokan. Horietatik gehienak, 289, liburuak dira. 65 bideo, 32 aldizkari, 7 liburu elektroniko eta 18 bestelako. Iaz baino gutxixeago dira, iaz 434 izan baitziren. Guztira, 127 argitaletxe, diskoetxe, talde, elkarte eta erakunde izango dira Azokan.
Zabalik, 10:30etan
Goizeko 10:30etan zabaldu eta gaueko 20:30etan itxi. Tarte horretan, 300 ekitalditik gora egingo dira. Horrez gain, Ahotsenea gunea 22:00ak arte egongo da zabalik, eta inoiz baino ekitaldi gehiago egingo dira bertan. Aurten gainera, Plateruena Kafe Antzokia ere egitarauan sartu dute.
Zabalkundean,
pauso berriak ematen
Durangoko azokak sekulako lana egin izan du 47 urteotan, disko eta liburu berriak zabaltzen laguntzeko. Horretan segi nahi du Gerediaga Elkarteak, eta azken urratsa dira diziplina berriei eskaini zaizkien guneak: Irudienea, Szenatokia, eta K@bia.
Ijitoen ‘Erromintxela’ hizkuntzari buruzko azterketa
Aurten Ijitoen Kultura gonbidatu dute Durangoko Azokara, gonbidatu berezi gisan. Kultur programazio berezia prestatu dute horretarako: haurrentzako tailerrak, ipuin kontaketa, jokoak... Emakume ijitoaren eguna eta haien aldarria, mahai inguruak... Azterketa bat ere aurkeztuko dute, ijito euskaldunen hizkuntzari buruzkoa: Erromintxela.
Saria, Benito Lertxundiri
Argizaiola saria Benito Lertxundirentzat izango da aurten, eta abenduaren 6an emango diote ekitaldi berezi batean. Ekitaldia Jon Maiak prestatu eta zuzenduko du: Gauean Argi.