Milaka lagun bildu ziren atzo sindikatu eta alderdiek deitutako mobilizazioetan, murrizketa neurrien kontra, eta lanpostu eta solidaritatearen alde. Besteak beste, Donostian manifestazioak izan ziren eguerdi eta arratsaldean, eta jendetza bildu zen bertan; tartean, hainbat hernaniar. Greba orokorrerako deia egina zegoen atzorako, eta Hernanin ez zuen ia jarraipenik izan. Hernaniko denda eta enpresa gehienak ireki egin zituzten ateak.
CCOO eta UGT gustora, emaitzarekin
Greba orokorrak utzitako datuekin oso gustora azaldu ziren atzo CCOO eta UGT sindikatu konbokatzaileak. Haien esanetan, «EAEko azpiegitura nagusien plantillek ia %100ean segi diote grebari. Bilboko portua, hiru aireportuak, Renfe, Tuvisa, Tcsa... Eraikuntza sektorea %60an gelditu da, eta industria %50ean. Estatu espainiarrean %80ko jarraipena izan du greba orokorrak».
Patronalen arabera, %3-5 inguruko jarraipena
Eusko Jaurlaritzak adierazi duenez, langile publikoen %4,5ek egin du greba, eta sektore pribatuan %10ek. Patronalen arabera berriz, %3-5ek.