Bi hernaniarrek irabazi dute Imanol Cover saria, Imanol Larzabal kantariaren omenezko lehiaketa: Ainara Ortega abeslariak eta Satxa Soriazu pianistak. Igande arratsaldean jokatu zuten finala Lugaritz kultur etxean, beste hiru finalisten kontra, ea zeinek egin bertsiorik onena, Imanol Larzabalen kantei. Hernaniarrek bi kanta aukeratu zituzten: Nire euskaltasuna eta Zure tristura. Epaimahaiaren iritziz, horiexek izan ziren onenak. Bigarren postuan: El Beso de Klint taldea; eta hirugarren postuan: Xabier Artieda eta Victor bikotea. Kantuak entzuteko aukera interneten: eitb.com-en.
Ortega: «Imanolen bi kanta horiek kantatzean erabat hunkitzen naiz»
Ainara Ortegak Kronikari jakinarazi dionez sekulako poza hartu zuen beraiek irabazi zutela esan zutenean. «Benetan esaten dizut ez nuela espero saria guri ematerik. Baina hartu, oso gustora hartu genuen». Bi kanta horiek zergatik aukeratu dituen galdetuta, Ortegak dio oraindik hunkitu egiten dela horiek kantatzean. «Nire euskaltasuna kantua, adibidez, 1986an ia kantatu ezinda geratzen zen Imanol, bizi zuen egoera bizi zuelako. Nik imajinatzen dut nola sentituko zuen berak momentu hura, eta hunkitu egiten naiz erabat. Zure tristura, Xabier Letek eta berak elkarrekin egina, hain da benetakoa, gogorra, hauskorra... eta hura kantatzen ikusten dut bera... Espero dut, aurrerantzean, Euskal Herrian izango dugula espazio bat, kanta guzti-guztiek lekua izango dutena».
Ortega eta Soriazu lagunak, Musikenen ikasi zutenetik
Bi hernaniarrok Musikenen ezagutu zuten elkar. Ortegak Kronikari adierazi dionez, Soriazuri proposatu zion lehiaketara aurkeztea, beti pendiente eduki dutelako horrelako zerbait egitea. «Azken aldian gauza asko egiten ari da Soriazu, eta oso onak, eta pentsatu nuen berari proposatzea. Aurrerantzean, ez dugu oraindik proiekturik; ikusiko dugu».
Gainerakoan, Ortega antzerki munduan dabil orain. Kantuan, Iñaki Salvadorrekin ari da, Kantagin taldean, eta euskal kantuekin egindako errepertorioa eskaintzen dute, herriz herri.