‘Ura eta Egurra’ erakusketa inauguratu berri du Gotzon Huegun eskultoreak Donostiako Aquariumean. Urtarrilaren 2ra arte ikusi ahal izango da, eta egun jakin batzuetan, doan: azaroaren 24ean eta abenduaren 15 eta 29an, besteak beste, arratsaldeko 17:00etatik 20:00etara bitartean.
Bixente Zaragueta lagun
Ostegunean inauguratu zen erakusketa, eta Gotzon Huegunek ez zuen prentsaurrekoa bakarrik eman. Hain zuzen, Aquariumeko zuzendari hernaniarra, Bixente Zaragueta izan zuen lagun. Eskerrak eman zizkioten elkarri. Huegunek Zaraguetari, «erakusketa jartzearen alde egin duelako, eskuzabal jokatuz». Zaraguetak Hueguni berriz, «egurrezko tailak maite ditudanez, eta hernaniarra naizenez, ohore bat delako zure erakusketa Aquariumean jartzea. Segi aurrera Gotzon, beti aurrera, arrakasta izango duzu eta!».
Kontenplatu dezatela
Huegunen esanetan, «erakusketan ez dago zerbait konkretua transmititzeko helbururik. Jendeak kontenplatu ditzala obrak, eta bakoitzak behar duena jasoko du. Begietatik sartzen diren lanak egiten saiatu naiz, gozamena eragiteko». Ikusten dituen irudi batzuek indarra dutela iruditzen zaionean, egur tailara eramaten ditu. «Piezetan mugimendua adieraztea adibidez, garrantzitsua da niretzat. Erakusketa honetako taila haundienean hidrogenozko bi partikula subatomikoen kolisioa irudikatu dut, fisika kuantikoko erreportaje bateko nanoargazkian ikusi bezala. Fisiko batek zoriondu egin ninduen, oso ondo irudikatu nuelako. Pedro Migel Etxenikek ikustea nahi nuke». Era honetako eskulturekin Huegunek erakutsi nahi du egur taila modernoa ere izan daitekeela. «Etxerik modernoenean ere ondo geratzen dira egurrezko tailak».