Lehengo urtean antolatu zuten lehenengoz San Martin eguneko festa Martindegi auzoan. Orduko arrakasta ikusita, aurten errepikatzea erabaki dute.
Haur-jolasak, goizean
Goizeko 11:00etarako martxan jarriko dira Oialumen. San Martin eguna ospatzeko, haur-jolasak egingo dituzte, eta helduek ere izango dute jolas horietan parte hartzeko aukera. Tartean sorpresatxoren bat egongo dela ere iragarri dute auzo elkartetik.
Festaren jarraipena, Sansonategin
Goizean zehar galdutako indarrak berreskuratzeko, lehengo urtean bezala, Sansonategi jatetxean bazkalduko dute. Babarrun-jana egingo dute, sakramentu eta guzti. Bazkalostean, festa giroan jarraituko dute, jatetxean bertan. Trikitilariak musika jartzen ariko dira. Horiez gain, txiste-kontalari, sasi-bertsolari eta espontaneoek ere aukera izango dute, jendea entretenitzeko.
Sakamantekasen zain
Arratsaldea pasa ahala parrandarako gogoa haunditu zaionak ez du zertan etxera joan beharko. Oialumera jaitsi eta menditik Sakamantekas etorri arte, festarekin jarraitu ahal izango da.