Lehengo urteko azaroaren 6an etenik gabe egin zuen euria. Goizean goizerako Urumeak urpean hartuta zituen Landare eta Zubipeko zelaiak. Hernaniarrak nahiko ohituta daude paisaia hori ikustera. Baina, orduek aurrera egin ahala, herriko beste hainbat txoko ere urpean geratu ziren. Azken 20 urteetan Hernanin izandako uholde haundiena izan zen lehengo urtekoa.
308 litro metro karratuko,
4 egunetan
Añarbeko urtegiak argitaratutako txostenaren arabera, normalena da azaro osoko prezipitazioetan metro karratuko 243 litro jasotzea. Lehengo urteko uholdeak gertatu zirenean, 4 egunetan metro karratuko 328 litro bildu ziren.
Era berean, argitu zuen ateak itxita eduki zituela, eta horri esker, Urumeak %75 ur gutxiago jaso zuela. Egun osoan zehar, Añarbek 10 milioi metro kubiko ur jaso zuen.
Kalte haundia
Zubipe eta batez ere, Landare ur azpian ikusteak ez zituen horrenbeste khernaniar harritu. Baina, eguerdi partean itsasgora zen, eta euria etenik gabe ari zuen. Hori horrela, ur-maila kolpean igo zela aipatu zuten hernaniar askok. Espero ez ziren eremuak ere harrapatu zituen orduan, ibaiak.
Karabel eta Portu auzoek igerileku itxura hartu zuten. Berdin, bi auzoen arteko errepide eta baratzek ere.
Floridan, Papelera del Norte parean errepidea moztuta geratu zen, urak hartuta. Baita Goizuetarako bidea ere. Izan ere, Fagollagan ura atera egin zen, eta bi lur jausi ere eragin zituen. Industriaguneetan, urak gainezka egin zuen, eta argi gabe geratu ziren, hala nola, Ibaiondon, Lastaolan, Ibarluzen eta Eziagon.
Osiñagan, barreneraino sartu zitzaien ura Altzueta, Iparragirre eta Elorrabi sagardotegietan. Bestalde, Elorrabiko zubia lekutik atera eta eraman egin zuen Urumeak. Telebista kate askotan bota zuten unea erakusten zuen bideoa, errugbilariek grabatua.