Azaroak 1, Santu Guztien Eguna da gaur eta herritar ugari izango dira hilerrira joango direnak hildako senide eta lagunei lore eskaintza egitera. Hori horrela, loreak erosteko aukera ugari izango da gaur Hernanin. Ohi bezala, Plazan postuak jarriko dituzte eta loradendak ere zabalik izango dira. Motak ere ugari: krabelinak, gladioloak, krisantelmoak, margaritak, larrosak... Saltzaileek Kronikari azaldu diotenez, «ez da lore mota bat bereziki nabarmentzen; denetik saltzen da». Zentroak, lore sortak edo solteak erosi, lekuaren arabera izaten omen da: «panteoiak dituztenek nahiago izaten dute zentroa erosi eta nitxoetarako lore sortak edo solteak».
Lau meza gaur eta bihar bi, Arimen Egunean
Hildakoen omenez, lau meza izango dira gaur: Agustindarretan 09:00etan izango da, Ereñotzuko San Antonio elizan 10:00etan, Floridako San Jose Langilea Parrokian 11:00etan, eta San Joan Bataiatzailea Parrokian 12:00etan. Bihar, berriz, Arimen Egunean, bi meza izango dira: 09:00etan Agustindarretan, eta 19:00etan San Joan Bataiatzailean.