Tarbesen (Frantzia) jokatuko da, bihartik aurrera, 22 urte azpiko Munduko Pelota Txapelketa. Bertan parte hartuko du Ioritz Arrieta pelotari hernaniarrak. Arrietak, estatuko selekzioarekin jokatuko du, Jaka, Bolinaga eta Rezusta pelotari gipuzkoarrekin, Etxamendi nafarrarekin eta Victor errioxarrarekin batera. Sei pelotariak eskuz banaka eta binaka jokatuko dute.
Lehen partidua, bihar
Ioritz Arrietak eskuz binaka jokatuko du, eta selekzionatzaileak aukeratzen badu, klasifikazio ligako lehen partidua bihar jokatuko du, Argentinaren kontra. Bigarren partidua berriz, astelehenean izango da, Kubaren aurka. Honetan sailkatzea lortuz gero, Arrieta finalerdietara pasako litzateke. Hau azaroaren 1ean jokatuko da. Azkenik, finala azaroaren 3an egingo da.
Txapelketa, interneten
Mundu mailako txapelketa interneten jarraitzeko aukera izango da, ondorengo web orrialdean: http://www.tarbes2012mondialpelote.fr/.
Munduko txapela jazten, 2garren hernaniarra
Aurtengo Munduko Pelota Txapelketan Ioritz Arrieta hernaniarrak jokatuko du. Irabaziz gero, txapela hau jantziko lukeen bigarren hernaniarra izango litzake. 1958an Biarritzen jokatu zen Munduko Txapelketan Patxi Bengoetxea hernaniarrak eskuratu zuen txapela. Beste hernaniar batzuk ere izan dira lehenago txapelketa honetan. Goiatz Manzisidor, Irati Ugalde edota Unai Alvarezek ere hartu dute parte lehia honetan, baina, finalera iritsi baziren ere, ez zuten lehen postua eskuratzea lortu. Txapeldunorde izan ziren.
Gipuzkoako Txapelketako partiduak, asteburuan
Atzo jokatu beharreko 3 partiduetatik 1 bertan behera geratu zen, infantilena hain zuzen. Gaur eta bihar, partidu gehiago izango dira.