Ave Maria parkean egitekoa zen ama presoen eskubideen aldeko ekitaldia Atsegindegin egingo da, eguraldi txarra bada. Ordua ere aurreratu dute, gaur arratsaldeko 17:00etara. Bertan, Araitz Zubimendi hernaniarraren eta bere alabaren kartzelako bizipenak izango dira ardatz. Zubimendi lehengo larunbatean itzuli zen Hernanira, 6 urteko kartzela zigorra beteta. Segiko kide izatea egotzita ezarri zioten zigor hori. Kartzelan Hize alabarekin bizi izandu da. «Kartzelan ama izatea abentura haundia» izan dela aipatu zuen Zubimendik lehengo larunbatean, Hernanira iritsi zenean. «Harrigarria da kartzelan maindire batek zer nolako jokua eman dezakeen, edota ur putzu txiki bat ozeano nola bihurtzen den. Orain, Hizek egunero joan nahi du hondartzara».
Ama presoen eskubideak
Gaurko ekitaldian, Araitz Zubimendi eta bere alaba Hize izango dira protagonista.
Kartzelan ama izateak nola eragiten duen, bizimodua bertan nolakoa den, eta bien arteko harremanetan nola eragiten duen azalduko du gaurkoan Zubimendik.