Ereñotzuko Udazken Kulturalean antolatutako ekintzen artean, gaurkoa izango da festa egunik haundiena. Goizeko 11:30etan hasiko dira gaurko egunerako prestatutako ekintzak, eta arratsalde osoan zehar gehiago izango dira.
Musika eta jan-edana, festaren ardatz
Goizeko 11:30etan, musikak eta hitzak hartuko dute protagonismoa. Bertsolarhitza ikuskizuna izango da kultur etxean. Bertan, bertsoak eta ipuinak nahastuko dituzte.
Arratsaldeko 17:00etatik aurrera, auzoko festa egingo da, plazan. Nahikoa jaki eta edari izango da guztientzat.
Batetik, auzoko bertako sagardoak dastatzeko eta gaztain erreak jateko aukera izango da. Bestetik, auzoko produktuekin azoka egingo da. Bukatzeko berriz, patata tortila lehiaketa egingo da.
Musika ez da faltako, eta eguna girotzeko, X. Solano eta J.M. Beasain trikitilariak bertan ibiliko dira.
Diapositiba emanaldia, asteartean
Ereñotzuko Udazken Kulturala hasi besterik ez da egin, eta oraindik, ekintza ugari izango dira.
Asteartean bertan, 19:00etan, Mendi eskia Iranen. Damavand 5.670 metro diapositiba emanaldia izango da.