Amher, Hernaniko Elkarte Multikulturalak, Kulturarteko Astea antolatu du. Gaurtik larunbatera, ekintza ugariz gozatzeko aukera izango dute haur eta helduek. Ekintza guztiak Biteri kultur etxean egingo dira.
Film proiekzioa gaur,
Kulturarteko Astea hasteko
Gaur bertan, Adivina quién viene esta noche filma proiektatuko dute, 19:00etan.
1967an Stanley Kramer-ek zuzendutako komedia honetan, agerian geratzen dira arraza desberdinekiko sortzen diren sentimendu eta kezka sozialak.
Protagonista familia dirudun bateko neska gazte bat da. Bere senargaia etxera eramango du afaltzera, gurasoek ezagutu dezaten. Hauek ordea, nahastuta sentituko dira; ideia liberalen aldekoak badira ere, alabaren senargaia beltza izateak kezkak sortuko dizkie.
Hitzaldia, bihar
Asteko egun potoloena biharkoa izango da. Amherreko kideek elkartea aurkeztuko dute, eta datozen hilabeteetarako finkatu dituzten helburuak zein diren azaldu eta prestatu dituzten ekintzen berri emango dute.
Era berean, Bizilagunak-La familia de al lado hitzaldia prestatu dute, elkarbizitzaz hitz egiteko.
Hitzaldia eta aurkezpena 19:00etan hasiko dira, Biterin.
Haurrak protagonista,
azken 2 egunetan
Kulturarteko Asteko azken 2 egunak, ostirala eta larunbata, haurrei zuzendutako egunak izango dira.
Ostiralean, arratsaldeko 17:00etatik aurrera, txokolatada eta ipuin kontaketa izango dira, Baraka taldearen eskutik. Ipuina, euskeraz eta arabieraz kontatuko da: Nasrudin eta bere astoa.
Larunbatean berriz, Hain anitza, hain ederra antzerkia ikusteko aukera izango da, 11:00etatik aurrera, Biterin. Haurrei zuzendutako antzezlan hau euskeraz ikusteko aukera izango da Zurrumurru taldearen eskutik.