Europa osoan antolatu den ekimena da Bizilagunak-La familia de al lado-Next door family. Helburua da, herrialde bakoitzean, bertako familiak eta atzerritarrak igandeko bazkarirako elkartzea, eta elkar ezagutzeko aukera ematea. Hernanin, dagoeneko, bat baino gehiago hasi da parte hartzeko izena ematen. Ostegunean egindako aurkezpenean Amherreko kideek azaldutakoaren arabera, «Euskal Herrian asko gustatzen zaigu jatearen kontua. Ospakizun gehienak janariaren inguruan egiten dira. Horrela, aukera polita izango dugu elkar ezagutzeko. Ikusiko dugu antzeko kezka, gustu, bizimodu... ditugula; desberdintasunek berriz, aberastu egiten gaituztela ikasiko dugu».
Europa osoko ekimena
Pragan sortu zen ideia, 2004ean, eta orduz geroztik, urtero egin dute Txekia osoan. Aurten, bazkaria azaroaren 18an egingo da Txekian, Eslovakian, Italian, Hungarian, Maltan, Belgikan, eta baita Gipuzkoan ere.
Parte hartzera animatzen den edonork eman dezake izena, nahiz familia txikia, haundia, seme-alabekin edo gabea, bikoteduna edo gabea, homosexuala nahiz heterosexuala... izan.
Parte hartzeko, izena eman
Gipuzkoan dagoeneko, 120 familia inguruk eman dute izena, ekimenean parte hartzeko. Oraindik bada animatzeko aukera, azaroaren hasiera bitartean. Parte hartu nahi duenak, ondorengo helbide elektronikoan aurkituko duen eskaera orria bete beharko du: http://www.nextdoorfamily.eu/
index.php/eu/.
Informazioa eskuratzeko edo izena emateko ere, 943 32 18 11ra deitu edo info@
mugak.org helbidera idatzi daiteke.
Izena ematerakoan, bazkaria norberaren etxean edo beste familiaren etxean egin nahi ote dugun zehaztu dezakegu. Ondoren, SOS Arrazakeriak bi familia elkarrekin kontaktuan jarriko ditu.
Bazkaritan, bi familiez gain, dinamizatzailea ere bertan izango da. «Intimitatean, etxeko espazio goxoan, ezagutuko dugu elkar».
Gaur, antzerkia
Amherrek antolatutako Kulturarteko Astea gaur bukatuko da. Haurrentzako Hain anitza, hain ederra antzerkia izango da Biterin, goizeko 11:00etatik aurrera.