Bi aste baino gehiago daramatzate Gureola-Celulosas de Hernani S.A. enpresako langileek kontzentrazioak egiten. Azaroaren 26ra arte, enpresa hartzekodunen prekonkurtsoan dago. Ordurako konponbiderik aurkitzen ez bada, enpresa hartzekodunen lehiaketan sartuko da, eta epailearen administraziopean geratuko da. Langileek prentsa ohar baten bidez azaldu dute: «enpresako zuzendaritza da egoeraren arduraduna eta egoera jasanezin honi irtenbide bat aurkitu arte borrokan jarraitzeko asmoa dugu».
Erantzunik ezean, mozioa
Astearetero eta ostegunero bezala, Gureolako langileek kontzentrazioa egin zuten atzo, Zinkoenean. Oraingoz, zuzendaritzaren erantzunik ez dutela jaso adierazi zuten, eta ondorioz, Udaleko Plenoan aurkezteko mozio bat prestatzen ari direla azaldu zuten.
Gainera, langileek diote «konponbiderako emandako epe guztiak pasa direla, eta enpresak ez duela hitzik sekula bete. Horrek, zuzendaritzarekiko mesfidantza izugarria sortu du».