Aurten ere, Leokako labaderoa emanaldi berezi baten agertoki izango da. Ohi bezala, Udal Berdintasun Sailak eta Berdintasun Kontseiluak emanaldi berezi bat antolatu dute. Hain zuzen, gaur izango da iluntzeko 20:30etan. Egunero akzioei omenaldia izeneko ikuskizuna eskainiko dute eta hitzak, musika eta dantzaren bitartez, leokan edota beste espazio batzuetan egiten den lan ikusezina omenduko da. Hala azaldu dute antolatzaileek: «Atzoko eta gaurko emakumeok espazio publiko eta pribatuetan egiten duten lana azaleratu eta txalotu nahi da».
Herriko emakume artisten parte hartzea
Emanaldi berezi honetarako Leokako labaderoa aukeratu dute historikoki emakumeek presentzia haundia izan dutelako bertan, «eta besteak beste, egiteko bat emakumeek erabiltzen zuten ingurune hori errekuperatzea delako». Horregatik eta egindako txukunketei eskerrak, leku egokia dela azaldu dute. Iaz bezala, herriko emakume artistek hartuko dute parte emanaldian.