Luis Mari Zaldua Etxabe urnietarrak Urumeako zilegimendietako toponimia izeneko liburua idatzi du eta gaur hitzaldia emango du, bertan bildutakoa azaltzeko. Ikerlan hori Zalduaren doktorego tesia da eta Patxi Salaberri Zaratiegiren (NUP) zuzendaritzapean egin du. Liburua, Hernaniko Udalak argitaratu du, Urnietakoarekin batera. Hitzaldia 19:30etan izango da Biterin.
Lau helburu
Zalduaren lan honek lau helburu ditu: toponimia arloan lanean ari behar dutenei baliagarri izatea; Urumeako zilegimendietan oinarrituta, euskal toponimian dauden elementuen izaera finkatzen laguntzea; zilegimendietako hizkera toponimiaren bidez zenbateraino ezagutu daitekeen ikustea; eta Gipuzkoako toponimiaren arautze eta normalizazioan aurrera egitea.
Egun, Hernani, Donostia eta Urnietako lurrak
Liburuan aztertzen den lurraldea (Urumeako zilegimendiak) Gipuzkoako ipar-ekialdean dago, Nafarroako muga-mugan. 38km2 dituen lurralde horrek izaera berezia izan du, baina egun Donostia, Hernani eta Urnietako udalerrienak diren lau zatitan banatua dago.