Azken urteetan bezalaxe, aurten ere, emanaldi berezi bat antolatu dute Udal Berdintasun Arloak eta Berdintasun Kontseiluak Leokako labaderoan. Ostiralarean izango da iluntzeko 20:30etan. Egunero Akzioei omenaldia izeneko ikuskizuna eskainiko dute eta hitzak, musika eta dantzaren bitartez, Leokan edota beste espazio batzuetan egiten den lan ikusezina omenduko da. Atzoko eta gaurko emakumeek espazio publiko eta pribatuetan egiten duten lana azaleratu eta txalotu nahi da.
Zergatik Leokako labaderoan? Emanaldia Leokako labaderoan izateak badu bere arrazoia. Antolatzaileek azaldu dutenez, «Leokako labaderoan historikoki emakumeek presentzia haundia izan dute eta zeregin asko daudela jakinik, egiteko bat emakumeek erabiltzen zuten ingurune hau errekuperatzea da. Duela urte batzuk egin ziren txukunketa eta garbiketa lanei eskerrak, leku gustagarri eta ederra izateaz gain, hainbat ikuskizunetarako egokia ere bada eta emankizun honetarako leku ezin hobea iruditu zaigu». Iaz bezala, herriko emakume artistek hartuko dute parte.