«Haserre gaude Udalaren jokabidearekin. Gure seme-alabek ikastolara joan ahal izateko bide seguru bat izango zutela ziurtatu ziguten eta ez dute ez egin, ez epe laburrera egiteko asmorik azaldu. Zinegotzi batek esan zigun bezala, `leku guztietan daude arriskuak», hala azaldu diote Kronikari prentsa ohar bidez, Elizatxo ikastolara trenbidetik doazen gurasoek. Diotenez, aurreko alkateak Marian Beitialarrangoitiak, Karabel eta Portu auzoen artean trenbidearen azpitik oinezkoentzako bide bat egingo zutela esan zien. Obra egin aurreko proiektua bukatzen ari omen ziren eta nahiz eta hauteskundeak izan eta Alkate aldaketa egon, proiektuak jarraipena izango zuela ziurtatu ziela diote. «Oraingo Udal taldeak ordea, ez zekiela ezer esan zigun eta Karabel eta Portu arteko urbanizazioa egin arte ez dela ezer egingo jakinarazi digute», diote gurasoek.
Arriskua, egunero
Bitartean, egunero bizi duten arriskua haundia dela gogorarazi dute eta beldur direla: «ume mordo bat trenbidetik doa (joan eta etorri) egunero-egunero Elizatxo ikastolara. Badira sillitan joaten direnak, trenbidea zeharkatzeko pasabidean gurpilak errailetan trabatuko zaizkien beldurrez. Tren azkarra pasatzen denean (Hernanin gelditzen ez dena) umeak ahal bezala eutsi eta babestuz ibiltzen gara».
Eta gaineratu dute: «Azken urteotan badira trenbidera erori izan diren umeak, eta azkeneko asteburu honetan trenak hildako bat eragin du».