Eguneroko bizitzan, herritarrek kotxea ahalik eta gutxien erabiltzeko kontzientzia hartzea nahi du Udalak eta helburu horrekin Mugikortasun Astea antolatu du, urtero bezala. Ostiralean hasiko da, Ibili norabide egokian! lelopean. Eta aurreneko egunerako, haur eta helduentzako zirkuituak antolatu dituzte. Mugitzeko balio duten tresna ezberdinekin jolasteko aukera izango da: sewgay, trikkeak, zapata saltariak... Larunbatean berriz, kotxerik gabeko eguna izango da eta lehenengo aldiz ibilaldia antolatu dute goizean, Hernanin zehar. Ibilaldian ez da aldaparik izango eta adin guztietako herritarrentzako izango da.
‘Nire lekuan jarri’ ginkana
Larunbat arratsaldean, hain arrakastatsua egin den kirol egokituaren ginkana izango da: Nire lekuan jarri. Ginkanaren helburua da: jolas giroan, desgaitasuna duten pertsonen tokian jartzea, eta haiek dituzten zailtasunak ezagutzea, baita nola gainditu daitezkeen zailtasun horiek jakitea. Aurten gonbite berezia egiten diete helduei.
Bizikleta Festa antolatzeko, hitzordua ostiralean
Bizikleta Festa igandean izango da eta ohi bezala Jocc Zikuñako Ama zikloturista taldea ari da antolaketa lanetan, besteak beste. Egunean bertan lan pixka bat egiteko prest daudenei dei egiten diete ostiralean 20:00etatik 21:00etara elkartetik pasatzeko.
MUGIKORTASUN ASTEA:
Irailak 21, ostirala:
16:30-19:30, zirkuituak haur eta nagusien entretenimendurako: sewgay, trikkeak, zapata saltariak... Tilosetan.
Irailak 22, larunbata:
10:00-12:00, goizeko ibilaldia Hernanin zehar (irteera Goiz Eguzkin).
17:30-19:30, kirol egokituaren ginkana: ‘Nire lekuan jarri’. Atsegindegin.
Irailak 25, igandea:
09:30-12:00, Bizikleta Festa Plaza Berritik abiatuta.
09:30-12:00, Bide heziketa zirkuitua Atsegindegin.
Irailak 29, larunbata:
10:30-13:30, 2. Eskuko Bizikleta Azoka, Atsegindegi plazan.
* Egoera onean dagoen edozein material saltzeko edo/eta erosteko aukera: bizikleta, patinak, patinete, kasko, mailotak... Salneurriak jabeak jarriko ditu (gehienez 300 euro). Saltzen ez den materiala jabeari itzuliko zaio.Materiala jasoko da azoka egunean, 09:00etatik-10:30etara, Atsegindegi plazan.
Informazio gehiago: 943575431; mertxe-g@hernani.net.