Amaia Garcia
Bihar hasiko da Donostiako Zinemaldia, ostiraletik aurrera zinemaren magiaz beteko da hiria. Zinemaldiak 60 urte betetzen ditu, eta urtemuga berezi hau ospatzeko edizio borobil bat egiten saiatuko dira. Bost Donostia Sari emango dira, historian sari gehien eman den edizioa izanez. Sarituak John Travolta, Ewan McGregor, Tommy Lee Jones, Dustin Hoffman eta Oliver Stone izango dira, azkeneko biek 60garren Urteurrenaren Donostia Sari Berezia jasoko dute. Guztiak Hollywood-eko industrian aski ezagunak dira. Baina Zinemaldia ez da Hollywood-etik bizi; mundu osoko filmak ikusteko aukera egongo da bihartik hurrengo larunbata bitarte.
Blancanieves
Pablo Berger zuzendari bilbotarrak Edurnezuri ipuinaren bertsio bitxi bat ekarriko digu. Espainia hegoaldean girotua dago, 20garren hamarkadan. Zezenketak, ametsak, fantasiak eta umorea dakar film mutu eta zuri beltz honek. Oscar sarietarako aurrez aukeratua izan da. Toronton kritika oso onak jaso ditu film honek.
Ikusgai: Film hau Sail Ofizialean egongo da ikusgai irailaren 22 eta 23an.
Dans le maison
François Ozon zuzendari frantsesaren azken lana da. Irakasle eta ikasle baten arteko harremanei buruzko filma da. Errealitateak eta fikzioak bat egiten dute nahasteraino. François Ozon hirugarren aldiz etorriko da Zinemaldira. 2000 urtean Sail Ofizialean lehiatu zen Sous le sable filmarekin eta 2009an Le refuge obrarekin Epaimahaiaren Sari berezia lortu zuen.
Ikusgai: Film hau Sail Ofizialean egongo da ikusgai irailaren 23 eta 24an.
Foxfire
1953ko New Yorkera eramango gaitu Laurent Cantet zuzendari frantsesak. Foxfire ezkutuko emakumezkoen elkartea sortu duen neska-talde baten erretratua egingo du. Taldeak mendeku-bidaia bati ekingo dio ezinezko amets bat betetzeko: beren arauen eta legeen arabera bizitzea. Laurent Cantet 1999an Zuzendari Berriak saria irabazi zuen Ressources humaines filmarekin.
Ikusgai: Film hau Sail Ofizialean egongo da ikusgai irailaren 24 eta 25ean.
Amour
Michael Haneke zuzendariaren azken filmak Urrezko Palmorria irabazi zuen Canneseko zinema-jaialdiaren azken edizioan. Georges eta Anne laurogei urteko musika-irakasleen arteko amodioa kolokan jarriko da Annek iktus bat jasan eta bere gorputza paralizatuta geratzen denean.
Ikusgai: Film hau Zabaltegin egongo da ikusgai irailaren 21, 22 eta 23an.
Zuloak
Fermin Muguruza musikariaren dokumental berriak emakumez bakarrik osatutako Zuloak rock taldearen ibilbidearen jarraipena egiten du. Euskal Herriko beste emakumezko musikari batzuen ekarpena ere aldarrikatzeko.
Ikusgai: Film hau Zabaltegin egongo da ikusgai irailaren 22, 23, 24 eta 25ean.
Baypass
Aitor Mazo eta Patxo Telleria aktore eta zuzendariaren bigarren filma komedia erromantikoa da. Xabik hilzorian dagoen Maria lagunaren azken orduak goxatzeko, berarekin maiteminduta dagoela kontatuko dio, baina Maria sendatzen denean, Xabik plantak egiten jarraitu beharko du.
Ikusgai: Film hau Zabaltegin egongo da ikusgai irailaren 25, 27 eta 28an.