Sagarretik sagardorako pausu guztiak gertutik ezagutu eta probatzeko festa, Plazan

sagarra eta sagardoaren festak hartuko dio erreleboa gaur atzoko ekitaldi arrakastatsuei. Dianak esnatuko du herria goizeko 09:00etan; eta handik aurrera, Plaza izango da festaren eszenatokia. Sagar erakusketa jarriko dute 10:30etan, goiztiarrenentzat. Ordu erdi geroago izango da eztarriak freskatzen hasteko garaia. Hernaniko hamabi sagardogilek 12na sagardo kaja eramango dituzte, probaketarako: Itxasburu, Goiko Lastola, Otsua Enea, Elo­rrabi, Zelaia, Altzueta, Larre Gain, Rufino, Akarregi, Al­berro, Iparragirre eta Olai­zolak. Probaketa debalde izango da, eta basoak, 2 euroan salduko dituzte. Mokadutxo bat egiteko aukera ere izango da bertan; 2 euroan baita ere, txorizo, hirugihar eta gazta pintxoak izango dira aukeran.
500 kizki lagun baietz!
Eguneko erronka nagusia, aurtengo nobedadea dena, 12:00etan hasiko da. IV. Sagar biltze herrikoia antolatu dute Plazan. Helburua, 500 lagun elkartzea sagarra kizkiarekin biltzen. Herri­tarrei eta inguruko bizilagunei azaltzeko deia egin  diete, guztien artean erronka gauzatzeko. Kizkiak bertan izango dira salgai, 5 euroan.

Herri kirolak, festarekin bukatzeko
Sagarraren inguruko azkeneko ekitaldia ere, ez da nolanahikoa. 18:00etan hasita, Astigarraga, Oiartzun, Goi­zueta eta Hernaniko lagunek hartuko dute parte sagarraren inguruko herri kiroletan. Proba guztiak azkarren egiten dituenak irabaziko du; hori bai, ikuskizuna, ziurtatua dago.

Pelota partiduak, Tilosetan
Euskal kulturari zuzenki lotuta dagoen beste kirol bat ere ez da faltako gaurko festan. Hernaniko pelotariek par­tidua jokatuko dute. Eguer­diko 11:30etatik aurrera izango da hori, Tilosetan.

XIV. Gazteen trikitixa Txapelketa

Sei herritako trikitilariak gaur, txapelen bila
Txapelketa Plaza Berrin, 12:00etan hasita.
KRISKITIÑA trikitixa taldeak antolatuta Gazteen Trikitixa txapelketa jokatuko da gaur, 12:00etan, Plaza Berrin.
Donostia, Zarautz, La­sarte-Oria, Zes­toa, Lastur eta Her­naniko trikitilariek hartuko dute parte; eta bakoitzak trikitixa, porrusalda eta fandangoa edo arin-arina joko ditu. Bikote irabazleak txapela bana jantziko du, eta gainontzekoentzako sariak izango dira.

IGANDEA
09:00 XI Argazki Rallya
09:00 Diana Txistulari Bandarekin
11:00 Sagardo dastatzea Plazan
11:30 Pelota partiduak Tilosetan
12:30 IV. Sagar biltze herrikoia Plazan
12:00 XIV. Trikitixa txapelketa Plaza Berrin
18:00 Sagarraren inguruko herri kirolak Plazan