Murrizketen aurka, eta Euskal Herriak erabakitzeko duen eskubidearen alde, Greba Orokorra deitu dute irailaren 26an ELA eta LAB sindikatuek. Prentsaurreko bana eman zuten atzo, eta beste hainbat aldarrikapenen artean, biak bat datoz esaterakoan, Rajoyren Gobernuak onartu berri dituen murrizketak azken hamarkadetako haundienak direla. Greba egunean antolatutako mobilizazioetan parte hartzeko deia egin diete herritarrei. Hala nola, goizean manifestazioak izango dira hiruburuetan; eta arratsaldean, herrietan. Hernanin, 18:00etan egingo da.
LAB:
«Erreskatea guk
ordaintzea nahi dute»
LABeko ordezkariek gogor salatu zituzten Espainiako Gobernuak hartutako neurriak, atzo goizeko prentsaurrekoan: «murrizketak 102.000 milioi eurokoak izango dira; bankari emango dizkioten 100.000 milioi euroetatik oso gertu. Diru hori gutxiago izango da oinarrizko zerbitzuak bermatzeko; enplegu politikak egiteko; eredu ekonomikoan inbertitzeko; prestazioak bermatzeko...; erreskatea guk ordaintzea nahi dute».
Adierazi zutenez, Greba justifikatua dago «orain arte egin diguten iruzur sozial eta politiko haundiena delako». LABek argi du zein diren euren aldarrikapenak: «bankari diru gehiagorik ez; euskal instituzioek murrizketak ez aplikatzea; politika publikoetan aldaketa; eta behingoz euskal instituzioak gizartearen zerbitzura jartzea».
Sindikatuak dio, alternatiba, egon badagoela, eta posible dela: «Euskal Herriak erabakia eta hitza behar du. Badago masa sozial bat bestelako bide bat hartzeko, krisiari benetako alternatiba emateko. Hau egiteko prest dagoen Gobernua falta da».
ELA:
«Gizarte osoa bultzatuko dute pobreziarantz»
Atzo eguerdian emandako prentsaurrean, ELAk bidegabekotzat jo zituen Rajoyren Gobernuak onartutako murrizketak: «hartu dituzten neurriak Europako Gobernuak maiatzean gomendutatakoak dira; bankarentzako 100.000 milioi euroko mailegua emateko baldintza ziren». Azaldu zuten, Gobernuak «opari hori» finantziatzeko erabaki duela, besteak beste gizarte murrizketak egitea, herri langileen soldata jaistea eta BEZa igotzea.
Neurri hauek medio, gizarte guztia pobreziarantz bultzatuko dutela diote: «BEZa %18tik %21era igo dute; langabezi prestazioak murriztu dituzte; menpeko pertsonei arreta eskubidea murriztu die; sektore publikoan paga bat kendu dute; denda ordutegiak liberatu dituzte, enpresen, kotizazioak jaitsi dituzte; gaurko eta biharko erretiratuek pentsio txikiagoak izango dituzte...».
Bestelako aukerak badaudela gogoratu zuten: «murrizketa horiek Euskal Herrian ez aplikatzea, eta politika fiskalak eta sozialak aldatzea, besteak beste».