Argazki Rally digitala izango da igadean Hernanin; 11garren edizioa. Izena egunean bertan eman behar da, 09:00etatik 10:00etara, Udaleko arkupetan. Rallya bi mailatan banatu dute. Alde batetik 12 urteko ume eta gaztetxoek hartu dezakete parte, debalde. Eta bestetik, 13 urtetik gorakoek, 5 euroren truke.
Gaia, egunean bertan
Gaiaren berri rallyaren hasieran emango dute, eta horien artean, Euskal Jaiak tarteko izango dira. Argazkiak 09:00etatik 14:00etara atera beharko dira; eremua, Hernaniko udalerria. Rallya bukatuta, argazkiak 13:00ak eta 14:00ak bitartean deskargatu ahal izango dira Villa Ave Marian; gehienez, 36. Horien artean, 6 aukeratu beharko dituzte, gai bakoitzeko bana. Egunean bertan entregatu ezin dituztenek irailaren 19ra arte izango dute aukera, info@forumhernani.org helbidera bidalita edo Foto Torresen entregatuta.
Irabazleak, apelaezinak
Epaimahaia Fotoforumeko hiru kidek osatuko dute eta erabakia apelaezina izango da. Sariak, hauek: Helduen mailan, bilduma onenari 190 euro eta trofeoa; bigarren sailkatuari 150 euro eta trofeoa; hernaniar baten bilduma onenari 125 euro eta trofeoa; eta Rallyko argazki onenari 125 euro eta trofeoa. Horrez gain, sari berezia jasoko du Euskal Jaien inguruko argazki onenak: datorren urteko kartela iragartzeko erabiliko da. Haurren mailan, bilduma onenak kamera digitala eta trofeoa irabaziko ditu; argazki bitxienak, oparia eta trofeoa eta argazki atseginenak oparia eta trofeoa.