Herriko haur eta gaztetxoei iritsi zaie udako oporrei agur esan eta eskolara bueltatzeko garaia. Urumea ikastolako eta Hernani BHI Institutuko ikasleek ostiralean hasi zuten ikasturte berria, baina ikasketak Hernanin egingo dituzten ikasle gehienek, 1.700 inguruk, gaur izango dute ikasturte berriko lehenengo eguna. Ikasle horiek, Langile, Elizatxo, Inmakulada eta Txirrita ikastetxeetako ikasleak dira. Denera, 3.000 inguru ikaslek egingo dituzte ikasketak Hernanin 2012-2013 ikasturtean. Maila ezberdinetan ariko dira: Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa eta Lanbide Heziketako erdi eta goi mailako zikloak.
Hasieran, goizez
Ikasle guztiek goizez bakarrik izango dituzte klaseak hasiera batean. Lehenengo astea pasa ostean, ordea, batzuk goiz eta arratsalde hasiko dira; Langilen esaterako. Urumea eta Txirritan, berriz, hilabetea bukatu ostean, urrian hasiko dira goiz eta arratsalde.