Haurrentzako ekitaldirik ez da faltako Zikuñagako festetan. Benetako protagonista beraiek izango dira hiru egunez, eta gaurtik hasita 12 ekitaldi dituzte prest, eta okurritzen zaizkien gehiago egiteko giroa ere bai. Toka, bote eta igel txapelketarekin hasiko dute festa gaur, eta puzgarriak ere izango dituzte bazkal garaira bitarte. Ondoren, beroak uxatu eta bazterrak txukun-txukun uzteko apar festa, 15:00etan. Arratsaldean ere puzgarriak izango dira hasieran, eta bukaeran korrika saio batzuk egiteko: erraldoi eta buruhaundiak.
Jokuak eta pottokak
Lo ondo egitea komeni zaie gaztetxoenei, biharko egunerako indarrean egon beharko baitute. Goiz guztian jokuak izango dituzte, eta pottokak ere izango dira. Bazkal garaian atseden hartu, eta borroka berezi-berezia dute zai: uraren guda. Bainu jantziak jantzita jaistea komeni, eta inguruan pasatzen dena dabilela erne, zipriztinak oso urruti iritsiko baitira bihar, Zikuñagan.
Urak gosea ematen omen du, eta txokolatada gustora hartuko dute txikienek. Hortik aurrera, beraien kabuz ibiltzeko modua izango dute, motorrak ondo berotuta izango baitira. Nahi izanez gero, helduen futbol txapelketa daukate ikusteko, biharamunean beraiek nola jokatu behar duten ikasteko.
Artistenek hasiko dute igandean eguna. Marrazki lehiaketa daukate 10:30etatik aurrera, 12:30ak arte, eta hor eskurik abilenak neurtuko dira hor. Izan ere, Zikuñagan badira oso esku abileko gazteak. Zikuñagako kartel lehiaketa irabazi duena da horietako bat: Endika Rekondo. Bejondeiola!
Esku pelota finala 12:30etan, eta futbol partidua 17:30etan. Festari azken kolpea indarrez emateko, zezensuzkoa eta azken traka.