Danbor hotsarekin kantatuko dute gaur Gora Zikuñagako Ama, himno berria. Joan den urtean aurkeztu zuten danborrada, eta aurten kantu berria egin dute, euren himno gisara hartuko dutena. Aurkezpena gaueko 21:30etan izango da, eta bertara gonbidatu dituzte Ozenki, Kantuz eta Umore Ona abesbatzak. Aurretik, danborradak kalejira egingo du, 20:00etan. Festaren lehenendabiziko eguna da gaur, eta hiru eguneko festa karga-karga eginda dator ekitaldiz. Musikak izango du bere lekua, biharko kontzertu eta guzti, baina baita jan eta edanak, kirolak, eta umeentzako ekitaldiek ere.
Danborrada, bigarren urtez
Joan den urtean estrenoa egin zuen Zikuñagako danborradak. Ume, gazte eta helduek parte hartu zuten danborradan, eta aurten bigarren urtez aterako dira, gaur, 20:00etan.
Kalejira egingo dute auzoan, eta ondoren etorriko da ginda jarriko dion ekitaldia: Gora Zikuñagako Ama kantua kantatuko dute hiru abesbatzek: Ozenki, Kantuz eta Umore Ona; hiru abesbatza horiek grabatu dute himnoa, Imanol Kamiok egin duena, eta gaur gonbidatu egin dituzte auzora. Bide batez, kanta gehiago ere eskainiko dituzte hiru abesbatzek: tartean, Hernaniko kirol taldeen himnoa eta ACT arraun ligako himnoa ere bai.
Zikuñagako himno bihurtuko da gaur aurkeztuko duten kantua. Arkaitz Larrañagak hasitako ideia eta bideari gaur emango zaio bukaera, beraz, danborrada eta koruen laguntzarekin.
Sagardo dastaketa, txokolatada, afari herrikoia...
Festa ere atseginagoa izaten da sabela ondo betez gero. Zikuñagako festetan ez da faltako aukerarik tripazorriei aurre egiteko. Bihartik hasita, tortilla lehiaketa dute eguerdian. Auzoko sukaldari arituenek urte guztian praktikatutakoa auzotarrei erakutsiko diete, ea zeinek daukan esku hobea.
Sagardoarekin bultzako diote tortillari. Horretarako sagardo probaketa dute, 12:30etatik aurrera. Txokolatada arratsaldean, eta gauean... afari herrikoia.
Euskal probak eta kirola, nahi adina
Bihar eta etzi, festako ajeak kentzeko modua jarriko dute Zikuñagan. Euskal probak dituzte bihar 17:30etan, motorrak ondo berotzeko. Iaz dezenteko berotua hartu zuten auzoko indartsuenek, harriari tiraka. Aurten ere izango da aukera izerdia botatzeko. Segidan, 19:00etan, futbolista abilenek finala jokatuko dute. Zikuñagako Ama futbito txapelketako finala jokatuko dute. Bihar helduek jokatuko dute, eta igandean auzoko txikiek, arratsaldeko 17:30etan. Aurretik, bote, toka eta igel txapelketak dituzte.
Triki-poteoa eta latino eta hip hop gaua, bihar
Musikarik ez da faltako Zikuñagan, aurten ere. Gaurko danborradari, bihar triki poteoak segiko dio arratsaldez. Afalostean, irrintziaren hotsean segiko dute, eta gauean, urtero jende mordoxka ekartzen duen kontzertua: latino eta hip hop gaua: Aduras Penas eta JC El Moreno. Aitzakia jarria dago Zikuñagan. Orain, joan eta gozatu.
Egitaraua
Gaur:
11:30, Haurren toka, bote eta igel lehiaketa.
11:00-13:00, puzgarriak.
15:00, apar festa.
16:00-18:00, puzgarriak.
18:00, erraldoi eta buruhaundiak.
20:00, danborrada.
21:30, ‘Gora Zikuñagako Ama’
abestiaren aurkezpena, abesbatzekin: Ozenki, Kantuz eta Umore Ona.
Larunbata,
Zikuñagako Amaren eguna:
10:30, haurrentzako jokuak eta
pottokak.
12:00, tortilla lehiaketa.
12:30, sagardo dastaketa.
15:00, urarekin guda.
17:00, txokolatada.
17:30, euskal probak.
19:00, Zikuñagako Ama futbito
finala.
20:00, triki poteoa.
21:30, afari herrikoia.
23:30, irrintzi lehiaketa.
00:00, latino eta hip hop gaua: AdurasPenas eta JC El Moreno.
Igandea:
10:30-12:30, marrazki lehiaketa.
12:30, haurren esku pelota finala.
15:00, siesta.
17:00, toka, bote eta igel
txapelketak.
17:30, haurren futbol partidua.
19:30, merienda.
21:30, zezensuzkoa eta azken traka.