Hernaniko errugbi elkarteak harpidetza kanpaina martxan jarri du lehenengo taldeak irailaren 8an hasiko duen denboraldiari begira. Aurten Hernani, Espainiako Estatuko maila gorenean lehiatuko da eta ondorioz, gastuak bikoiztu egin dira. Bidaia gehiago eta urrutiago egin behar izateaz gain, elkartearen apustua da fitxaketak egin beharrean, jokalarien baldintzak hobetzea. Hori horrela, gastu horiei aurre egiteko, herritarren babesa ezinbestekoa dute eta bi bide jarri dituzte: laguntzaile eginda (30 euro), edo abonatua eginda (50 euro).
Abonatu ez direnek,
5 euro partidu bakoitzeko
Klubak jakinarazi duenez, gastuak tarteko, partidu bakoitzeko 5 euroko sarrera ordainaraztea erabaki du. Dena dela, abonatua eginez gero, Landareko partidu guztiak ikusteko aukera izango da 50 euroren truke. Eta horrez gain, bertan egingo den Adarragako tartaren zozketan parte hartuko du abonatuak eta baita bi lagunentzako bazkari edo afarirako zozketan ere. Gutxienez, 12 partidu jokatuko dira Landaren. 16 urte baino gutxiago dutenek sarrera dohainik izango dute.
Laguntzaileek, berriz, 30 euroren truke, taldea ekonomikoki laguntzeaz gain, aipatutako bi lagunentzako bazkari edo afarirako zozketan parte hartuko dute.
Eskaerak Landaren,
web orrian eta tabernetan
Eskaerak egiteko aukera ugari daude: Landaren, 14ra arte, astelehenetik ostiralera, 18:00etatik 20:00etara; www.hernanirugby.com orrian, gaurtik aurrera; eta tabernetan: Rioja, Zintzarri, Haida, Joxe Mari, Kide, Ekos, Leoka, Karrero, Rufino, Txili, Aralar, Bodega, Atxur, Caserio, Kixkal, Tamer, Zumitza, Onddi, Tripontzi, Goiz Argi, Depor eta Irizar. Horrez gain, bi aste hauetan ere herriko erdigunean hainbat salmenta gune jarriko dituzte. Gaur Tilosetan ere izango da aukera.
Txartelak Landaren eskuratu daitezke partidu egunetan.