Gaurtik aurrera, Txantxangorriko Sagardo Lehiaketan parte hartu nahi duten guztiek izango dute aukera izena emateko. Bazkideei bakarrik zuzendutako epea atzo bukatu zen. Gehienez, 156 lagunentzako izango da lekua.
Lehiaketa irailaren 14an izango da elkarteko lorategian, 20:00etatik aurrera. Izena emateko, elkarteko bulegotik pasa behar da. Ordainketa izena ematerakoan egin behar da. Ordainagiria emango dute momentuan.
25 euroren truke,
afari ederra
Afariaren prezioa 25 eurokoa da eta trukean menu ederra prestatu dute: arraultza egosia, bakailua bizkaierara eta saltsa berdean, bertako saiheskia, Urbasako gazta, kafea, kopa eta purua.
15 sagardo lehian
Gipuzkoako 15 sagardotegitako sagardoak izango dira lehian. Hernanikoak 5 izango dira.
Puntuaketari dagokionez, sagardo bakoitza 5 (gutxienez) eta 10 (gehienez) puntuatuko da. Eta behin txapelketa hasiz gero etortzen direnek ezingo dute puntuaketan parte hartu. Sailkapena txapelketa bukatzean jakinaraziko da.
Parte hartzaileak:
Hernanikoak 5: Elorrabi, Otsua-Enea, Itxasburu, Rufino eta Zelaia.
Astigarragakoak 6: Petritegi, Bereziartua, Herrero, Oyarbide, Gurutzeta eta Lizeaga.
Donostiakoa: Barkaiztegi.
Zubietakoa: Astiazaran.
Andoaingoa: Gaztañaga.
Urnietakoa: Eula.