Hernaniko zortzi sagardogile Donostian izango dira larunbatean, beste 32 sagardogilerekin batera. Sagardo Eguna egingo dute aurten 27garren aldiz, Gipuzkoako Sagardogileen Elkarteak antolatuta, eta bertan izango dira, 11:00etatik aurrera, Hernaniko Akarregi, Alberro, Itxasburu, Iparragirre, Larre-Gain, Elorrabi, Otsua-enea eta Rufino sagardotegiak. Euskal Jaien barruan antolatzen dute urtero Sagardo Eguna, eta ikusmin berezia piztuko dute bi idi-parek, 2012ko lehenengo muztioa eramango baitute Karreto-barrikatan edo Garliatan. Bi idi pareak Loiola kaletik eta Saguesetik etorriko dira, eta muztioa probatzeko aukera izango dute bidean laguntzen dietenek. Bi idi-pareak goizeko 11:00etan abiatuko dira, eta 12:15etan txalapartariek egingo diete harrera Konstituzio plazan, kirikoketa dantzatuko da, eta ohorezko topa egingo dute sagardogile, gonbidatu eta omendu guztiek; aurten bertsolariek.
Bertsolariei omenaldia
Bertsolariak eta bertsolaritza omenduko ditu aurten Gipuzkoako Sagardogileen Elkarteak «bien arteko mendeetako harremana azaldu eta estutzeko». Ekitaldia 12:15etan izango da, Karreto-barrikak iritsi eta berehala.
Bertso saioak txotx garaian
Omenaldiaz gain, 2013ko txotx garaian bertso saioak antolatuko dituzte sagardotegietan, mendeetako ohiturari segida emateko, gaur egunera egokituta.