Portu hiru egunez girotu ostean, agurtu dira San Joan Txikiak

Atzo bukatu ziren Portuko San Joan Txiki jaiak hiru egunez auzoa eta auzotarrak girotu ostean. Urtero bezala, azken egunerako txokolatada, Diana, meza eta pelota partidua izan ziren goizean. Pelotan, Paul Ojuelek txapeldun tituluari eusten jarrai­tzen du. Berez, ohitura den moduan, Unai Alvarezen aurka jokatu behar bazuen ere, azkenean Eñaut Esnaola izan zuen aurrez aurre. Partidua 30era luzatzea erabaki zuten eta Ojuelek 30-20 irabazi zuen.
Eguerdi partean sagardo probaketa egin zen eta eguraldi ederra lagun, herritar ugari bildu zen. Agin Rezola eta Aitor Mendiluze bertsolariek girotu zuten aurretik plaza. Ondoren Toka eta Bo­te txapelketak jokatu ziren. Tokan Javi Rodriguezek irabazi zuen eta botean Txin­txelak.

Teresuk, lorerik politena
Hiru egunetan lehiaketa eta txapelketa ugari jokatu dira eta honakoak izan dira irabazleak. Marrazki lehiaketan, Beñatek irabazi du haundietan eta Intza Ota­men­dik txikietan. Lorontzi lehiaketan, Teresu izan da irabazlea. Atzetik geratu dira Feli eta Alazne. Karabina txapelketan Paul Alvarezek izan du punteria onena. Bigarrena Beñat Errondosoro izan da. Altxorra bilatzen trebeenak, berriz, Uxue eta Julen Albe­rro anai-arrebak izan dira. Larunbatean Asto Karrera famatua egin zen eta hiru karreretatik bi Axier Elizon­dok irabazi zituen.