Herritar talde batek errepidea moztu zuen herenegun ilunabarrean, Axalan. Iosu Uribetxeberria euskal preso politikoaren askatasunari buruzko erabakia atzeratzea erabaki zuen astelehenean Auzitegi Nazionalak eta erabaki hori salatzeko eta Uribetxeberriaren askatasuna eskatzeko burutu zuten ekimena.
Hala azaldu dute Kronikara bidalitako prentsa oharrean: «Espainiako Gobernuaren azken erabakia, Iosu Uribetxeberriaren egoera beste bi aste inguru luzatzea, giza eskubideen urraketa nabarmena da eta euskal jendartearen gehiengoak duen bake nahiaren aurrean, adar jotze makabroa».
«Erabakia atzeratzeak
isladatzen du, mendeku gose onartezin bat»
Gaineratu dutenez, erabakia atzeratzea mendeku gosearen ondorio da eta bake egoera urrundu nahi dutenak kontentatzeko egina: «Iosu Uribetxeberriaren osasun egoera oso larria eta delikatua da, txosten mediku guztiek hala dela diote. Bere egoera edozein momentutan kritikoa eta fatala bilakatu daiteke. Minbizia du, fase terminalean, eta gaixotasunak ez du atzera bueltarik. Iosuren askatasunaren inguruko erabakia atzeratzeak mendeku gose onartezina islatzen du eta giza eskubideak urratzea. Erabaki hau, gatazka betikotu eta bake egoera urrundu besterik nahi ez duten sektoreak kontentatzeko erabakia da».
Horrez gain, honakoa ere gaineratu dute: «Uribetxeberriak aske geratu behar du, berehala eta inolako aitzakiarik gabe legea betez. Orain arte entzun ditugun eta entzuten ari garen aitzaki guztiak onartezinak dira. Iosuren sufrimendua luzatu eta bere egoera muturreraino eraman nahi dute, Iosu heriotzaren atarian utziz».
Soluzioen garaia
Egoera hau ezin dela errepikatu nabarmendu dute eta herritarrei dei egiten diete mobilizatzeko. «Iosuk eta gaixo dauden gainontzeko euskal preso politikoek aske geratu behar dute eta espetxe politikak egungo errepresio gakoetatik, konponbide demokratiko baten klabeetara pasa behar du. Soluzioen garaia da, guztion artean bakea eraikitzekoa, arduraz jokatzekoa».
Elkarretaratzeak,
Donostia, Bilbo,
Gasteiz eta Iruñean
Gogorarazi dute 14 ordutako elkarretaratzeak ari direla egiten egunero Donostiako Ospitalean eta 12 lagun gose greba mugagabean daudela bertan. Bilbo, Gasteiz eta Iruñean ere elkarretaratzeak ari dira egiten. Bertan parte hartzeko gonbitea luzatzen diete herritarrei.