Patxi Zeberiok 25-30 irabazi zion atzo Miguel Mari Urrutiari eta bera izango da Koteto Ezkurraren aurka neurtuko dena datorren larunbatean. Buruz Buruko Kutxa Torneoko lehenengo finalerdia izango da. Atzoko partidua emozioz betekoa izan zen, izan ere, Zeberiok 25 tantotan edo gutxiagotan utzi beharra zeukan Urrutia finalerdietara pasatzeko eta Urrutiak nahikoa zuen 26 tantotara iristea. Baina azkenean ezin izan zuen lortu Saldiaseko atzelariak. Norgehiagoka parekatua izan zen hasieran eta Urrutiak lau tantoko aldea ere lortu zuen zenbaitetan: 8-4 eta 10-6. Hortik aurrera, ordea, Elduaingo aurrelariak hartu zuen agintea eta partidua bukatu arte halaxe jarraitu zuen.