Gaixo larriek bizi duten egoera zabaltzeko asmoz, Etxerat elkarteak dokumental bat egin du, Gaitz isilduak izenekoa. Uztailean aurkeztu zuten. 45 minututan, gaixo larrien zerrendan dauden 14 presoren bizipenak bildu dituzte; tartean, Gari Arruarte hernaniarrarenak. Presoen senide eta lagunen testigantzak azaltzen dira eta Arruarteren ama, Izaskun Santa Cruz ageri da, besteak beste. Dokumentala ikusgai dago Youtuben (Gaitz isilduak sartuta).
Kezka eta esperantza
Dokumentala hiru zatitan banatzen da. Lehenengo zatian, preso bakoitzaren senide edo lagunek banaka-banaka presoaren aurkezpena egiten dute, eta baita atxilotze data, preso egon den espetxeak, egungo espetxea, etxetik dagoen distantzia...
Bigarren zatian ere banaka, preso bakoitzaren gaixotasunaren berri ematen dute. Baita espetxean dituzten baldintzen berri eta bizi duten egoeraren berri ere. Espetxeko baldintzak bestela ere gogorrak direla azpimarratzen dute eta gaixo egonda, egoera oraindik ere zailagoa dela. Gutxienez bizi kalitatea izan dezatela eskatzen dute eta eskubideak errespetatzea: «Gizakiak dira. Eskubideak dauzkate, giza eskubideak, edozein presok bezala eta kalean dagoen edozein pertsonak bezala».
Azken zatian aurrera begira bakoitzak espero duena azaltzen du. Gehienek kezka azaltzen dute eta aldi berean esperantza. Kalean, jendeak ematen dien babesa ere eskertzen dute. Eta honakoak dira hainbat adierazpen: «Guk horrela jarraitzen badugu aurrera, pausoak emanez, eurek ere pausoak eman beharko dituzte»; «Zerbait lortu behar badugu, denon artean lortu behar dugu. Denok gure aletxoa jarri behar dugu»; «Kostako da, baina lortuko dugu etxera ekartzea».
Uribetxeberriaren kasua
Dokumentala orain dela hilabete aurkeztu zen eta hilabete honetan zehar egoera aldatu egin da, batez ere, Iosu Uribetxeberriari dagokionean. Preso arrasatearrak minbizi terminala du eta abuztuaren 8tik gose greban dago Donostiako ospitalean, bere askatasunaren alde. Espetxeetako Zuzendaritzak ostiralean erabaki zuen Uribetxeberriari hirugarren gradua ematea eta orain Audientzia Nazionalak erabakiko du zer egingo duten. Uribetxeberriarekin eta gainerako gaixo larriekin elkartasunez egiten ari diren protestak eta gose grebak asko dira egunotan.
Bertso saioa, gaur arratsean
Protesta ekintzak segi egiten dute, Uribetxeberriaren askatasuna eskatzeko. Gaur, kontzentrazioa izango da, egunero bezala, 10:00etatik 22:00etara, Donostia Ospitalaren aurrean. Horrez gain, bertso saioa izango da, 18:00etan.
Gaixo larriak
- Iñaki Etxeberria
- Iosu Uribetxeberria
- Iñaki Erro
- Jesus Mari Mendinueta
- Jose Ramon Lopez de Abetxuko
- Garikoitz Arruarte
- Inma Berriozabal
- Gotzone Lopez de Luzuriaga
- Jose Miguel Etxeandia
- Jose Angel Biguri
- Isidro Garalde
- Txus Martin
- Aitzol Gogorza
- Josetxo Arizkuren