Euskal selekzioaren aldeko mendi martxa Astigarragara iritsiko da gaur

Gaur iritsiko da Astigarra­gara Euskal Selekzioaren aldeko mendi martxa ESAIT­ek antolatzen duena. Aurten 12garren aldiz antolatu dute mendi martxa, eta Bidaxu­ne­tik (Behe-Nafarroa) Do­nos­tia­ra egingo dute martxa, bederatzi egunetan.

Astigarragan loa
Gaur, arra­tsaldeko 18:30-19:00ak aldera iritsiko dira Astigarragara, eta on­gi etorri ofiziala egingo diete udal or­dezkariek. On­doren herri afaria dute. Frontoian lo egingo dute, eta bihar abiatuko dira Donostiara, goizeko 08:30ak aldera. Azkeneko etapa mo­tzaxeagoa izango dute, 12:00ak inguruan iritsiko baitira Gipuzkoako hiriburura, Loiola, Egia eta Gros pasata. Han ere udal ordezkariek harrera ofiziala egingo diete, Donostiako Alde Zaharrean, Konsti­tuzio Plazan.

Selekzioaren Eguna, bihar
Hain justu, mendi martxaren bukaerak kointziditu egiten du Esaitek urtero antolatzen duen Selekzioaren Egunare­kin. Aurten Donostian egingo dute Selekzioaren Eguna, eta ekitaldi pila bat prestatu dituzte, egun pasa ederra egiteko, Euskal Selekzioaren alde. Ekitaldietan lehenengoa izango da, mendi mar­txan datozenei harrera. 

Aurten Nafarroan egin dute ia bide guztia
Esaiteko arduradunek erabaki dute, aurten Nafarroan egitea ia mendi martxa guztia, Na­fa­rroa konkistatu zutela 500­ urte bete direla eta. Bederatzi etapa egingo dituzte, eta horietatik zortzi Na­fa­rroan: «Bidaxunen hasiko ga­ra, Behe-Nafarroan. Han egin­go ditugu lau eta­pa: Aihe­rra, Irisarri, Doni­bane Ga­razi eta Aldude. Eta hor pasako du­gu sasi-muga, Na­fa­rroa Ga­raia­ra. Aldu­de­tik Arraio­­­tze­ra eta han­dik Igan­tzira. Eta handik Gipuzkoara iritsiko gara, Astigarragan lo egin eta Donostian bukatzeko».

Hernaniarrei deia, azken egunean parte hartzeko
Azken etapa izango da mo­tzena, aurreko egunetan 8 or­du ibili baitira egunero (25-30 km inguru). Antolatzaileek dei egin diete hernaniarrei, Astigarragatik Donostiarako etapan parte hartzeko, edo bestela Selekzio Egunera joateko, Donostiara.