Festetako nobedadea izango da, eta jendetza ziurtatua dago. Arkume jatea antolatu dute gaur Aranon, Santio festen barruan. Lehenengo aldiz antolatu eta arrakasta izan du deialdiak, ia 200 lagun elkartuko baitira. Hogeitik gora arkume erreko dituzte, herriko plazan. Entsalada mixta, gazta eta kafeak osatuko dute menua, eta guztia autoktonoa izango da, Aranon hazia. Arkume jatea herriko frontoian egingo dute eta bazkaltzeko txartelak aldez aurretik erosi behar ziren. Karpa haundi bat jarri dute okasiorako, eta ederki etorriko da, euria bada.
Kantu saioa, bazkalostean
Bertso musikatuak antolatu dituzte bazkaldu ondorenean, arratsaldea girotzeko asmoarekin. Ordubete inguruko saioa izango da, bi zatitan banatuta. Kantuan Eñaut Agirre ariko da, eta bailarako bertso zahar eta berriak kantatuko ditu lehendabizi; ondoren, historiako bertso aukeraketa bat kantatuko du. Pianoan Imanol Kamio ariko da; gitarrarekin Aitor Atxega; eta biolinarekin, Mirari Irurtzun.
Goi mailako bertso saioa, ondoren
Rezola, Lujanbio, Soto eta Egaña bertsolariek jarriko dute festa ondoren. Goi mailako bertso saioa antolatu dute, 19:30etatik aurrera.
Eguneko ekitaldi nagusiak bukatuta, afaltzera elkartuko dira auzotarrak. Eta eguna bukatzeko, nola ez, erromeria antolatu dute: Gozo-Gozo taldeak izango du herria dantzan jartzeko ardura.