Mendi ibilia prestatu dute datorren asteburuan, Abiadura Haundiko Trenaren kontra. Edozeinek egiteko moduko ibilia da, eta Urruñatik Hernanira etorriko dira, ostiraletik igandera. Mezua: Lurra maite dugulako, AHT eta azpiegitura haundiak gelditu!
AHTren kontrako asanbladak antolatu du mendi martxa. «Urte askoan AHTren aurkako Akanpadaz gozatzeko aukera izan dugu, 16 aldiz. Aurten aldatu egin dugu formatua, momentu egokia iruditu zaigulako. Filosofia berarekin, mendi martxa egingo dugu aurten. Iparralde eta hegoaldeko lurraren alde, AHTren eta azpiegitura haundien kontra, kontzertuak, hitzaldiak, antzerkia, hizketaldiak... denetik egingo dugu, elkarbizitza eta harremanak landu...».
Urtebetean gauza asko gertatu dira, AHTren kontrako asanbladak dioenez: «obrak izugarri aurreratu dira, krisiagatik gobernuak diru faltan dira, Barcinaren tartazoa, epaiketak... Hiru egunotan aldarrikatuko dugu, era honetako proiektuek liskarra besterik ez dakarkitela. Urruñatik Hernanira joango gara, paraje benetan ederretan: Txingudi, Jaizkibel, Lezo...».