Egun seinalatua dute gaur Kaxkoko bizilagunek. Egun bateko festa izan arren, gogotik ospatzen dute Karmen Eguna, goizetik gauera. Dianak esnatuko du Kaxkoa 09:30etan; aurretik, hildako bizilagunen omenezko meza emango dute Agustinetan, 09:00etan hasita. Eguneko ekitaldi nagusia 12:00etan izango da. Suziriak markatuko du festen hasiera. Ondoren, urtebeterako kargua hartuko duen Alkatea izendatuko dute. Juani LuKasek izango du ohorea 2012-2013an. Omenaldia ere, izango da gaurkoan; Josefina Catedrak jasoko du, Kaxkoan hainbeste urtetan lan egin ostean. Bazkaltzera elkartuko dira eguerdian, eta arratsaldean, jokoak antolatu dituzte guztientzat. Kartetan aritu nahi dutenek Kardaberaz kalean dute zita; igel, toka eta bote jokoan Kale Nagusian ariko dira; eta txikienentzako puzgarriak Plaza Berrin jarriko dituzte. Iluntzean, balkoi lehiaketako eta jokoetako sariak banatuko ditu Alkate berriak. Eta segidan, sardinak jatera elkartuko dira guztiak, Plaza Berrin. Musikak girotuko ditu festa eguneko azken orduak.
09:00 Meza Agustinetan
09:30 Diana
12:00 Txupinazoa
- Alkatea: Juani Lukas
- Omendua: Josefina Catedra
- Balkoi lehiaketa
- Trikitixa Kaxkoan zehar
14:00 Herri Bazkaria Plaza Berrin
16:30 Karta jokoa Kardaberazen
16:30 Igel, Toka eta Bote jokoak, Kale Nagusian
17:00-19:00 Puzgarriak Plaza Berrin
18:00 Txokolatada
20:00 Sari Banakaeta
20:00-22:00 Sardin jatea
22:30 Txupinazoa bukatzeko